Astanada «Jas sarbaz» uıymynyń úzdik jas tárbıelenýshileri anyqtalady
ASTANA. KAZINFORM — Astanada «Jas sarbaz» áskerı-patrıottyq klýbtarynyń qatysýymen polıgondyq jıyn saltanatty túrde ashyldy.
Jıyn Astanadaǵy № 68665 áskerı bóliminiń bazasynda bastaldy. Іs-sharaǵa Qarýly Kúshterdiń ardagerleri, Qorǵanys isteri jónindegi departamentiniń, Jastar saıasaty máseleleri basqarmasynyń basshylyǵy, sondaı-aq áskerı bólim komandırleri men «Jas sarbaz» qozǵalysynyń ókilderi qatysty.
Іrikteý birneshe kúnge jalǵasady. Nátıjesinde Astananyń atynan Aqtóbe qalasynda ótetin XI Halyqaralyq áskerı-patrıottyq jastar jıynyna qatysatyn ókilder tańdalyp alynady.
— Bıyl Uly Jeńistiń 80 jyldyǵy men Álııa Moldaǵulovanyń týǵanyna 100 jyl tolýyna oraı, Aqtóbe oblysynda XI Halyqaralyq «Aıbyn» áskerı-patrıottyq jastar jıyny ótedi. Baıqaý nátıjesinde Astananyń atynan qatysatyn eń úzdik 4 komanda anyqtalady. Búgin bastaý alǵan «Jas sarbaz — Jeńis rýhynyń jalǵasy» jobasy aıasynda úsh kúndik áskerı-patrıottyq polıgondyq jıyn ótedi. Jastar beltemirge tartylý, avtomat jınaý, arqan tartý, sondaı-aq «Smart sarbaz» zııatkerlik oıyndary sekildi saıystarda baq synaıdy. 150 qatysýshynyń ishinen 75 úzdigin iriktep alamyz, — dedi «Jas sarbaz» áskerı-patrıottyq jastar qozǵalysynyń elordalyq fılıalynyń tóraǵasy Ashat Nalshybek.
Іs-shara barysynda Qarýly Kúshteriniń ardageri, general-maıor Marat Naǵymanov, Astana qalasy Jastar saıasaty máseleleri basqarmasynyń basshysy Samat Ibraev jáne respýblıkalyq «Jas sarbaz» qozǵalysynyń tóraǵasy Meıirbek Mendiǵalıev qatysýshylarǵa aqjol tilep, sóz sóıledi.
Resmı bólim kontserttik baǵdarlamamen jalǵasty. Jınalǵandarǵa Qarýly Kúshteriniń Ulttyq áskerı-patrıottyq ortalyǵynyń ánshileri men orkestri, qazaq estradasynyń juldyzy Ibragım Eskendir, Qurmetti qaraýyl rotasy jáne «Jas sarbaz» stýdııasynyń ártisteri óner kórsetti.
Іs-shara sońynda qatysýshylar áskerı tehnıkanyń kórmesin tamashalap, áskerı bólimmen tanysý ekskýrsııasyna qatysty.
Aıta ketelik Ulttyq ulanǵa 7 000 jas sarbaz shaqyrylatyny týraly jazǵan edik.