Astanada jas rejısserlerdiń I respýblıkalyq forým-festıvali ótedi
ASTANA. QazAqparat - 2017 jyldyń 2-8 qyrkúıegi aralyǵynda Astanada Qazaqstan Respýblıkasy Mádenıet jáne sport mınıstrliginiń qoldaýymen halyqaralyq EKSPO-2017 kórmesiniń mádenı baǵdarlamasy aıasynda Qazaqstan Teatrlary assotsıatsııasy Jas rejısserlerdiń Qaırat Súgirbekov atyndaǵy I Respýblıkalyq forým-festıvalin ótkizedi.
«Jas rejısserler - qazaq teatrynyń erteńi. Ulttyq sahna óneriniń qulashyn keń jaıyp, álem aldynda tanylýy da jas býynnyń izdenisteri men umtylystarynan bastaý alady. Atalmysh óner merekesinde jas rejısserlerdiń, sheberlik saǵattarynan ótip, rýhanı sabaq alyp, dúnıetanymdarynyń ózgerip, ónerde ózgeshe jol, baǵyt baǵdar alary sózsiz. Forým-festıval jas teatr rejısserleriniń shyǵarmashylyǵyna jol ashyp, qazaq rejıssýrasyn jańa esimdermen tolyqtyrýdy, sonymen qatar jas jáne tanymal teatr rejısserlerine pikirtalastar, lektsııalar, sheberlik-synyptary, semınarlar baǵdarlamalary arqyly bilim jáne kommýnıkatsııa alańyn jasap, otandyq rejıssýra óneriniń órisin keńeıtýge múmkindik týǵyzady»,-delingen atalmysh sharaǵa baılanysty taratylǵan baspasóz-baıanynda.
Sondaı-aq, shara qazaqtyń jańashyl teatr rejısseri Qaırat Súgirbekovtiń esimin este qaldyrý maqsatynda uıymdastyrylýda. Sharanyń basty maqsaty - talantty jas rejısserler shyǵarmashylyǵyna qoǵam men qalyń kópshiliktiń nazaryn aýdarý.
Forým-festıvalge Respýblıkamyzdaǵy 20-40 jas aralyǵyndaǵy jas rejısserler Elik Nursultan, Dáýren Sergazın, Dına Qunanbaıqyzy, Rústem Janyamanov, Bolat Abdrahmanov, Farhad Moldaǵalıev, Juldyzbek Jumanbaı, Gúlnáz Qamysbaeva, Meıram Habıbýllın, Aıdyn Salbanovtar qatysady.
Alty kún boıy Astana qalasynyń qonaqtary men turǵyndary forým-festıval barysynda M. Áýezov atyndaǵy Qazaq Memlekettik akademııalyq drama teatry, Ǵ.Músirepov atyndaǵy balalar men jasóspirimder teatry, Respýblıkalyq akademııalyq nemis drama teatry, Astana Jastar teatry, Aqtóbe oblystyq Alaqaı teatry, S.Muqanov atyndaǵy Soltústik Qazaqstan oblystyq qazaq drama teatry , Shyǵys Qazaqstan oblystyq Jastar teatry , A. I teatry, J.Shanın atyndaǵy oblystyq akademııalyq qazaq drama teatry , Almaty qalasy memlekettik qýyrshaq teatry, Atyraý oblystyq Mahambet Ótemisuly atyndaǵy qazaq drama teatrlarynyń qoıylymdaryn tamashalaı alady.
