Astanada jas polıtseılerdiń kadet synyby ashyldy
ASTANA. QazAqparat - Astanada jas polıtseılerdiń kadet synyby ashyldy, dep habarlaıdy QazAqparat qalalyq Polıtsııa departamentiniń baspasóz qyzmetine silteme jasap.
Jergilikti polıtsııa qyzmetiniń basqarmasy kadr jumysy basqarmasymen birlesip Raıymbek batyr atyndaǵy «Qazǵarysh» № 50 mektep-lıtseıinde «Jas polıtseıler kadet synybyn» ashty.
Onda 10-synyptan 30 oqýshy, 6-synyptan 20 oqýshy ant qabyldady.
«Barlyq kadet synyp oqýshylary Jarǵynyń talaptaryn oryndaýǵa mindetti, sonymen qatar «Jas polıtseıler kadet synybynyń» erejelerine sáıkes yjdaǵattylyq pen tabandylyqqa ıe bolýǵa, jan-jaqty damyǵan bolýǵa, bilimdi jáne mádenıetti adam bolýǵa, qoǵamdyq jáne óz áskerı boryshyn adal oryndaýǵa daıyn bolýǵa, polıtsııa qyzmetkerlerimen birlesip qoǵamdyq tártipti saqtaýǵa qatysýǵa, mektep ishindegi ishki tártip pen erejelerdi saqtaýǵa, baǵalap qurmetteýge mindetti», - delingen habarlamada.
Sonymen qatar, 2019 jyly qaladaǵy №25, 61, 74 mektepterde «Jas polıtseıler kadet synyptaryn» ashý josparlanyp otyr.
