Astanada jas pedagogterdiń ІІ respýblıkalyq forýmy bastaldy

ASTANA. KAZINFORM - Astana qalasynda jas pedagogterdiń «Pedagogıkalyq pýls: Jas pedagog daýysy» atty ІІ respýblıkalyq forýmy óz jumysyn bastady, dep habarlaıdy QR Oqý-aǵartý mınıstrliginiń baspasóz qyzmeti.

29–30 sáýir kúnderine josparlanǵan aýqymdy shara elimizde jarııalanǵan Tsıfrlandyrý jáne jasandy ıntellekt jyly aıasynda ótip, bilim berý salasyndaǵy ózekti máselelerdi talqylaıtyn mańyzdy alańǵa aınalyp otyr.

Bıylǵy forým «AI–PEDAGOG 2026: bilim berýde jasandy ıntellektini ıntegratsııalaý» taqyrybyna arnaldy. Bul bastama jas pedagogterdiń jańa tehnologııalardy meńgerýine, olardy oqý protsesine tıimdi engizýine jáne kásibı damýyna baǵyttaldy.

Іs-sharanyń basty maqsaty - tehnıkalyq jáne kásiptik bilim berý júıesindegi jas mamandardyń kásibı quzyrettiligin arttyrý, olardyń motıvatsııasyn kúsheıtý jáne tsıfrlyq transformatsııa jaǵdaıynda básekege qabilettiligin nyǵaıtý.

Forýmǵa memlekettik organdardyń ókilderi, salalyq uıymdar men jetekshi IT-kompanııalar, halyqaralyq sarapshylar, sondaı-aq elimizdiń túkpir-túkpirinen kelgen jas pedagogter men stýdentter qatysyp jatyr. Bul alań túrli býyn ókilderin biriktirip, bilim berý júıesiniń bolashaǵyn birge qalyptastyrýǵa múmkindik beredi.

Baǵdarlama aıasynda qatysýshylardy mazmundy ári tájirıbege baǵyttalǵan sessııalar kútip tur.

- Atap aıtqanda, jasandy ıntellektini bilim berý protsesinde qoldanýdyń praktıkalyq keısteri usynylyp, halyqaralyq jáne otandyq sarapshylardyń qatysýymen sheberlik synyptary ótkiziledi. Sonymen qatar soft skills, kreatıvti oılaý jáne kóshbasshylyq qabiletterdi damytýǵa arnalǵan trenıngter uıymdastyrylady,-delingen habarlamada.

Osyǵan deıin pedagog qyzmetin baǵalaý júıesi jańaratyny týraly jazdyq.