Astanada jas otbasylar arasynda «Birge ómir súrý» atty festıval ótti

ASTANA. QazAqparat - Búgin Astanada kóp ultty, ıaǵnı, eki túrli ult ókilinen quralǵan, tatý-tátti, talantty jas otbasylardyń «Birge ómir súrý» atty festıvali ótti. Sharany uıymdastyryp otyrǵan bilim jáne ǵylym mınıstrliginiń ókilderi aıtqandaı, baıqaýdyń negizgi maqsaty - otbasy qundylyqtaryn dáriptep, ulttar arasyndaǵy tatýlyqty nyǵaıtý.

«Birge ómir súrý» jastar festıvali negizinen eń talantty, dostyǵy men tatýlyǵy berik kóp ultty otbasylardyń úlken jınalysy desek bolady. Festıval bilim jáne ǵylym mınıstrligi tarapynan bıyl úshinshi ret uıymdastyrylyp otyr. Ózderińiz biletindeı, 2015 jyl Qazaqstan halqy Assambleıasynyń 20 jyldyǵy toılanyp jatqandyqtan, bıylǵy festıvaldiń mazmuny da tereńdeı tústi», - deıdi BǴM Jastar saıasaty departamentiniń basqarma basshysy Aıtpaı Dosanov.

Onyń aıtýynsha, Qazaqstannyń óńir-óńirinen festıvalge qatysamyn dep ótinish bergen otbasylar kóp boldy. Festıvaldiń basty talaby - otbasy eki ult ókiliniń berik ári talantty odaǵy bolý kerek. Sonymen qatar, jubaılardyń jasy 29-dan aspaýy kerek.

«Festıvaldiń talaby boıynsha, aımaqtardaǵy otbasylar aldymen onlaın-rejımde irikteýden ótti. 29 jasqa tolmaǵan, eki ult ókilinen quralǵan otbasylar iriktelip, óz óńirinde taǵy synaldy. Osylaısha, eń talantty, eki adamnyń da qandaı da bir salada jetistikteri bar 10 otbasy iriktelip, Astanadaǵy qorytyndy festıvalge kelip otyr», - dep tolyqtyrdy ol.