Astanada jas mamandardy qoldaý jármeńkesi ótti
ASTANA.KAZINFORM – 24 maýsym kúni Astana qalasy ákimdiginiń «Kásiptik-tehnıkalyq kolledji» ShJQ MKK bazasynda túlekterdi jumyspen qamtý jáne áleýmettik seriktestik aıasynda keń kólemdi kásibı baǵdar berý sharasy – bos jumys oryndary jármeńkesi ótti.
Uıymdastyrýshylardyń aıtýynsha, bul is-shara kolledj túlekteri men jumys berýshiler arasynda tikeleı baılanys ornatýǵa múmkindik berip, taraptar arasyndaǵy bolashaq áriptestik baǵyttaryn anyqtaýǵa yqpal etti.
– Búgingi is-sharaǵa Rixos jáne Sheraton qonaq úıleri, Allur Auto Astana, Subaru Motor Astana, Porsche Centre Astana sııaqty avtosalondar, sondaı-aq Vector Service, Welding Company, On Green Technology, Stroıbat LUXE, Alkon+, Astana Tazalyq syndy óndiristik jáne servıstik kompanııalar qatysyp otyr, – dedi uıymdastyrýshylar.
Jármeńkede elektromonter, elektrogazben dánekerleýshi, avtomobıldiń elektr jabdyqtaryn jóndeý elektrıgi, tehnık-mehanık, jol-qurylys mashınalarynyń mashınısi, kondıter jáne aspaz sekildi suranysqa ıe jumysshy mamandyqtar boıynsha bos jumys oryndary usynyldy.
– Ár túlek jumys berýshilermen jeke suhbattasyp, ózine qajetti aqparat alyp, túıindemesin qaldyryp jatyr. Kóptegen stýdentterge oqýyn aıaqtaǵan soń tájirıbeden ótý jáne jumysqa ornalasý boıynsha usynystar berildi, – dep málimdedi kolledj qyzmetkerleri.
Іs-shara barysynda túlekterge arnalǵan rezıýme jazý, iskerlik qarym-qatynas ornatý, jumys suhbatynan ótý boıynsha arnaıy trenıngter uıymdastyryldy. Tájirıbeli mamandar jas túlekterge eńbek naryǵynda qajet bolatyn praktıkalyq daǵdylar men paıdaly keńester berdi.
Kolledj dırektorynyń oqý-óndiristik jumys jónindegi orynbasary Tileýbaev Omarbek Orynbekulynyń aıtýynsha, bıyl 237 stýdent bes mamandyq boıynsha oqýyn aıaqtady.
– Olardyń barlyǵy – jumysshy mamandyq ıeleri: avtoslesar, avtoelektrık, elektrık, dánekerleýshi, tiginshi jáne aspaz. Barlyq stýdentter memlekettik emtıhannan sátti ótip, óz baǵalaryn aldy. Endi biz olardyń jumysqa ornalasýyna kómektesýdi kózdep otyrmyz, – dedi ol.
Onyń aıtýynsha, oqý orny birneshe jyldan beri birqatar kásiporyndarmen seriktestik ornatyp, stýdentter sol mekemelerde óndiristik tájirıbeden ótken.
– Hyundai Center, Allur Astana, Rixos Hotel, Astana elektrotehnıkalyq zaýyty syndy kásiporyndar túlekterimizdi jumysqa qabyldaýǵa daıyn ekenin jetkizdi. Sonymen qatar búgin rezıýme toltyrý, suhbattan sátti ótý boıynsha master-klasstar uıymdastyrdyq. Búgingi jármeńkege 16 kásiporyn qatysyp otyr, – dedi Tileýbaev.
Sonymen qatar ol sózinde oqý ornyna qabyldaý 9 jáne 11-synyp bazasynda júrgiziledi. Bıyl tek 9-synypty aıaqtaǵan túlekter qabyldandy. Oqý merzimi – 2 jyl 10 aı nemese 3 jyl. Kolledjde jasy 18-ge tolmaǵan stýdentter de bar dedi.
Sheraton Astana mamandyq irikteýshisi Dına Aıken kolledjben uzaq jyldan beri seriktestikte jumys istep kele jatqanyn atap ótti.
– Bizdiń qonaqúıde stýdentter óndiristik tájirıbeden ótip, keıin turaqty jumysqa ornalasyp jatady. Qonaq úı salasy jas maman úshin tamasha múmkindik, óıtkeni tek tamaqtaný men qabyldaý bólimi emes, sonymen qatar qarjy, kadr, marketıng jáne satý bólimderinde de ósý múmkindigi bar, – dedi ol.
Onyń aıtýynsha, Sheraton Astana qonaqúıinde qyzmetkerlerge resmı eńbek sharty, aqyly demalys, eńbekke jaramsyzdyq paraǵyna tólem, korporatıvtik mádenıet, qyzmetkerlerge arnalǵan is-sharalar jáne qosymsha jeńildikter qarastyrylǵan.
Mamandardyń aıtýynsha, mundaı jármeńkeler tek jumysqa ornalasýǵa septesip qana qoımaı, oqý oryndary men jumys berýshiler arasyndaǵy kásibı baılanysty nyǵaıtyp, oqytý júıesin damytýǵa jáne mamandar daıarlaý sapasyn arttyrady.
Buǵan deıin, Astanada jastarǵa jumysshy mamandyqtaryn tanystyrý is-sharasy ótkenin habarlaǵanbyz.