Astanada jas qyzǵa tıisken kúdikti avtobýstaǵy kameralardyń kómegimen ustaldy
NUR-SULTAN. QazAqparat – Astanada kópqabatty úıdiń kireberisinde jas qyzǵa tıisken kúdikti ustaldy. Ol 20 jastaǵy stýdent bolyp shyqty, dep habarlaıdy QazAqparat tilshisi.
«Jedel-izdestirý is-sharalaryn júrgizý barysynda 20 jastaǵy stýdent ustaldy. Osy jyldyń 18 sáýirinde jas jigit aıaldamada qyzdy kezdestirgeni anyqtaldy. Avtobýspen birge júrip, onyń sońynan ergen. Úıdiń kireberisinde tanysýǵa tyrysqan. Biraq qyz qarsylyq bildirgen soń ony erkinen tys qorlamaq bolǵan», - dep atap ótedi Nur-Sultan qalalyq polıtsııa departamentinen.
CTS kompanııasynyń baspasóz hatshysy Naýzat Azanbaeva Facebook paraqshasynda kúdiktiniń avtobýstaǵy beınebaqylaý kameralarynyń kómegimen ustalǵanyn jazady.
Polıtsııa departamentiniń málimetinshe, jas jigittiń ústinen QR Ákimshilik quqyq buzýshylyq týraly kodeksiniń 434 babymen is qozǵalǵan. Sońǵy sheshimdi elordanyń mamandandyrylǵan aýdanaralyq ákimshilik soty shyǵaratyn bolady.
Buǵan deıin áleýmettik jelide belgisiz er adamnyń jas qyzǵa tıiskeni beınelengen vıdeo taraǵan bolatyn. Qyz saǵat 21:00 shamasynda úıine oralǵan. Vıdeodan úıdiń kireberisinde belgisiz adamnyń qyzǵa tıiskeni anyq baıqalady. Keıin qyzdyń ákesi polıtsııaǵa shaǵym túsirgen edi.
