Astanada «Jas qutqarýshy-saıahatshylar» úıirmesi ashyldy
ASTANA. QazAqparat - Elordadaǵy J.Jabaev atyndaǵy №4 mektep-gımnazııada Astana qalasynyń «Jas saıahatshylar stansasynyń» quramyna engen «Jas qutqarýshy-saıahatshylar» úıirmesiniń saltanatty ashylýy ótti, dep habarlanǵan elorda ákimdiginiń resmı saıtynda.
Stansada taýdaǵy saıahat, jaıaý saıahat, quzǵa órmeleý, baǵdarlaý, sýdaǵy saıahat, alpınızm jáne saıahattyń basqa da túrleri boıynsha 16 baǵyttaǵy úıirmeler jumys isteıdi. Jalpy munda 700-den astam oqýshy men stýdent saıahat jasaý negizderin meńgerýde. Qazirgi kezde stansanyń kóptegen túlekteri qutqarý qyzmeti júıesinde qyzmet etip júr. Munda jas saıahatshylarǵa saıahattyń belsendi túrlerimen baılanysty mamandyqtar boıynsha kadrlar daıyndaýǵa baǵyttalǵan kásibı baǵdarlaý jumystary júrgiziledi. «Jas qutqarýshy-saıahatshylar» úıirmesinde ótkiziletin sabaqtarda oqýshylarǵa tirshilik qaýipsizdiginiń negizderi, tótenshe jaǵdaılarda durys áreket etý, alǵashqy medıtsınalyq kómek kórsetý jáne basqa da daǵdylar úıretiledi. Sondaı-aq mektepte respýblıkalyq jáne halyqaralyq jarystarǵa qatysatyn jas qutqarýshylar daıyndalady.
