Astanada jas kóshbasshylar forýmy ótip jatyr

Elorda ákimdigi men Qoǵamdyq damý mınıstrligine qarasty Jastar jáne otbasy isteri komıteti birlesip uıymdastyrǵan sharaǵa JOO men kolledjderdiń kóshbasshy stýdentteri qatysýda.

«Búgingi sharanyń maqsaty - Astanadaǵy jastar uıymdarynyń kóshbasshylarymen aldaǵy jastar jylyna oraı ótetin is-sharalardy talqylaý jáne jastardyń usynystary men ıdeıalaryn tyńdaý. Erkin dıalogtik formatta ótip jatqan forýmda jastar ózderiniń kókeılerinde júrgen suraqtaryna jaýap alýmen qatar, óz usynystaryn bildire alady. Biz óz kezegimizde olardy tyńdap, sonyń negizinde keshendi baǵdarlama ázirleıtin bolamyz», - dedi Astana qalasy ákimdigi Qoǵamdyq damý isteri basqarmasynyń basshysy Danııar Esın.

Onyń aıtýynsha Astana jastary respýblıkalyq deıgeıdegi mańyzy bar jobalarda naqty isterimen óz úlesterin qosýy tıis.

Búginde elimizde ákimdikter men memlekettik organdardan bólek jastar saıasatymen aınalysatyn 549 úkimettik emes uıym bar, onyń 10-y respýblıkalyq deńgeıde.

«Jastar saıasaty memlekettik saıasattyń ajyramas bóligi, ol týraly Elbasymyz óziniń ár joldaýy men qatysqan jıyndarynda aıtyp júr. Qazaqstanda 18 mln-nan astam halyq bolsa, sonyń 4 mln-y jastar. Olar ishinara túrli kategorııalarǵa bólinedi -  stýdentter, jumys isteıtin men jumys istemeıtin jastar jáne taǵy basqa. Osy turǵyda bizge aldymen atalǵan krıterıılerdi anyqtap, jalpy qabyldanatyn baǵdarlama sonyń barlyǵyn qamtýy tıis», - dedi QR Qoǵamdyq damý mınıstrligi Jastar jáne otbasy isteri komıteti tóraǵasynyń mindetin atqarýshy Ashat Oralov.

Onyń sózine qaraǵanda, jastarǵa arnalǵan baǵdarlamanyń 5 negizgi basym baǵyty bolýy qajet, aldymen sapaly jáne qoljetimdi bilim, ekinshi turaqty jumyspen qamtamasyz etý, úshinshi jastar úshin qoljetimdi baspana, tórtinshi, jas otbasylarǵa shańyraqty saqtaý men bala tárbıesinde qoldaý kórsetý jáne sońǵysy jastar arasynda salaýatty ómir saltyn dáripteý.

Aıta keteıik, osydan eki kún buryn Elbasynyń jarlyǵymen 2019 jyl jastar jyly bolyp jarııalandy.