Astanada «Jas qanat» mýzykalyq baıqaýy óz shymyldyǵyn ashty (FOTO)
ASTANA. QazAqparat - Elordada elimizdiń basty mýzykalyq baıqaýlarynyń biri «Jas qanat» óz shymyldyǵyn ashty. Bıyl jas oryndaýshylar baıqaýy 25-shi ret ótkizilmek. Beıbitshilik jáne kelisim saraıynda erekshe mýzykalyq atmosfera ornap, qonaqtar nazaryna ádemi dekoratsııalar usynyldy, dep habarlady qalalyq ákimdiktiń baspasóz qyzmeti.
Baıqaý 2001 jyldan beri Astanada uıymdastyrylýda. Sharanyń ashylý saltanatyna alǵash bolyp otandyq estrada juldyzdary - burynǵy baıqaýlardyń jeńimpazdary Medeý Arynbaev, Erlan Kókeev, Baqyt Shadaeva, Nurlan Abdýllın, Mádına Sádýaqasova, Janar Doǵalova, Marjan Arapbaeva, sondaı-aq, konkýrstyń negizin qalaýshy Murat Erǵalıev keldi. Astana ákiminiń orynbasary Ermek Amanshaev konkýrsqa qatysýshylarǵa sáttilik tiledi.
- Bıyl «Jas qanatqa» 25 jyl bolady. «Jas qanat» zor múmkindikterge jol ashady - bul bolashaq juldyzdar úshin mobıldi, kreatıvti, jeńil alań, atalǵan baıqaý táýelsizdigimizdiń qurdasy. Osy jyldar ishinde telekórermendermen, uıymdastyrýshylarmen birge «Jas qanat» damyp, ósip keledi, - dedi Ermek Amanshaev.
Bıyl baıqaýda Aqtóbe, Oral, Semeı, Óskemen, Almaty, Taldyqorǵan, Shymkent, Jezqazǵan jáne Qaraǵandy qalalarynan kelgen 14 qatysýshy baǵyn synaıdy. Úsh oryndaýshy elorda namysyn qorǵaıdy.
Konkýrsqa qatysýshylar án aıtý sheberlikterin, horeografııalyq daıyndyǵyn jáne ádemi kostıýmderin kórsetti. QR eńbek sińirgen mádenıet qaıratkerleri men burynǵy «Jas qanat» jeńimpazdarynan qurylǵan qazylar alqasy oryndaýshylardy súısine tyńdady.
Aıta keteıik, jas oryndaýshylardyń «Jas qanat» baıqaýy 22 mamyrǵa deıin ótedi. Bul kúni qazylar alqasy jeńimpazdyń esimin jarııa etedi.
