Astanada «Jas qanat» baıqaýy bastalady
ASTANA. QazAqparat - Búgin Beıbitshilik jáne kelisim saraıynda «Jas qanat» jıyrma tórtinshi respýblıkalyq jas oryndaýshylar baıqaýynyń ashylý saltanaty ótedi. Sahna tórinde elimizdiń 10 qalasynan 15 jas ánshi synǵa túsedi, dep habarlady astana.gov.kz.
Qatysýshylar ózderiniń ónerin 3 saıystyq kezeńde kórsetetin bolady. Jas ánshiler qatań ádil qazylardyń aldynda 3 kún boıy ónerin kórsetedi. Aqtyq synǵa tek 3 úmitker jetedi. Sáıkesinshe, olar «altyn», «kúmis», «qola» qanattardyń ıesi atanady.
Baıqaý uıymdastyrýshylary: Astana qalasy ákimdiginiń Mádenıet basqarmasy jáne «Azııa daýysy» dırektsııasy, «Habar» agenttigi. Baıqaý qarsańynda «jasqanattyqtar» Qazaq ulttyq óner ýnıversıtetin tamashalap qaıtty. Ekskýrsııany daryndy kompozıtor Serik Erkimbekov ótkizdi. Ol ýnıversıtet tarıhyn, stýdentterdiń jetistikterin aıta kele, qatysýshylarǵa sáttilik tiledi. Sonymen qatar, qatysýshylar Táýelsizdik saraıynda da boldy. Astana qalasynyń maketin kórgennen keıin «4D» formatynda Báıterek jaıly qysqametrajdy fılmdi kórip, tamsandy. 27 mamyrda kópten kútken jerebe tartý rásimi ótti. Petropavl qalasynyń týmasy Mıras Baıanov sahna shymyldyǵyn ashatyn bolsa, «sátti» jetinshi nomerde kókshetaýlyq Rınat Temirjan óner kórsetedi. Al on úshinshi nomer astanalyq Sultan Ahmetke buıyrdy. Keshtiń núktesin qoıý Merhat Qanapııanovqa buıyrdy. Jerebe tartý rásiminen keıin dástúrli túrde Beıbitshilik jáne Kelisim saraıynyń saıabaǵynda «Jas qanat-2015» alleıasy otyrǵyzyldy. Ár qatysýshy óz armanyn jazyp, jerdiń astyna saqtap qoıdy. Aıta keteıik, «Jas qanat» respýblıkalyq baıqaýynyń aqtyq syny 31 mamyrda ótedi.
