Astanada jas ǵalym Súndet Kárimovtiń kitaptary tanystyryldy
ASTANA. QazAqparat - Búgin elordadaǵy QR Ulttyq akademııalyq kitaphanasynda jas ǵalym Súndet Kárimovtiń tórt kitaby tanystyryldy. Belgili ǵalymdar men stýdentterdiń qatysýymen ótken bul sharada kópshilik nazaryna «Shıtti-maqta talshyǵyn alǵashqy óńdeý ádisterin jetildirý», «Energııa únemdegish avtomobılder», «Toqyma óndirisiniń materıaltanýy» jáne «Konstrýktsııalyq materıaldar tehnologııasy» atty oqý quraldary usynyldy.
«Ǵylymmen aınalysýǵa tıispiz, sebebi bul baǵytta sál artta qalsaq, biz múmkindikterimizden aırylamyz. «Máńgilik el» ıdeıasyn júzege asyrý jastardyń qolynda. Bolashaqta jastardyń aldynda talaı belesterdi eńserý maqsaty tur. Sondyqtan osyndaı kitaptar búginde óte qajet jáne aldaǵy ýaqytta da Súndet baýyrymyz bundaı eńbekterdi jazýdan qanaty talmasyn dep tileımin. Jastaıynan ǵylymǵa bet burǵan osyndaı azamattar jastarǵa úlgi»,- dedi QR UǴA akademıgi, matematıka ǵylymdarynyń doktory, QR Memlekettik syılyǵynyń laýreaty Muhtarbaı Ótelbaev. Aıta keteıik, Súndet Kárimov 1986 jyly dúnıege kelgen. Búginde ol tehnıka ǵylymdarynyń kandıdaty, professor, Halyqaralyq ınjenerlik akademııasynyń korrespondent-múshesi. Ǵylym salasynda 1 ǵylym kandıdatyn, 7 magıstr daıyndaǵan. Jas ǵalym birqatar elderden alynǵan patentterdiń, birineshe ǵylymı jobalardyń, sondaı-aq 50-den astam ǵylymı maqalalardyń avtory.
