Astanada jas bard oryndaýshylary respýblıkalyq festıvalda bas qosady
ASTANA. 6 sáýir. QazAqparat - 6-8 sáýir kúnderi Astanada respýblıkalyq jas bard oryndaýshylardyń festıvali ótedi, dep habarlady óner merekesiniń baspasóz qyzmeti.
Bıylǵy festıval Dúnıejúzilik densaýlyq kúnine oraılastyrylyp otyr.
Festıvaldiń uıymdastyrýshylary - QR Bilim jáne ǵylym mınıstrliginiń Qosymsha bilim berý respýblıkalyq oqytý-metodıkalyq ortalyǵy, Astana qalasy Bilim departamenti, Astana qalasy jas týrıster stansasy, Salaýatty ómir saltyn qalyptastyrý ortalyǵy.
Festıvalǵa Qazaqstannyń túkpir-túkpirinen jas bardtar qatysady. Festıvaldiń qurmetti qonaqtarynyń quramynda Roman Lankın (Tomsk), Evgenıı Sýhoterın (Omsk), Jeńis Ysqaqov (Máskeý) sııaqty ataqty oryndaýshylar shaqyryldy. Jas týrıster stansasy festıvaliniń baǵdarlamasyna qatysýshylarǵa arnalǵan shyǵarmashylyq sheberlik sabaqtary, basqa qaladan kelgen qatysýshylarǵa ekskýrsııa, «Shaıhana» ázil-syqaq kontserti ótedi.
Osy janrdyń jankúıerleri 6 sáýir kúni ótken jyldyń laýreattary men festıval qonaqtarynyń kontsertin kóre alady. 7 sáýir kúni,- saıyskerlik kontsert, al 8 sáýir kúni saǵ. 12.00-de qorytyndy Gala-kontsert ótedi. Kontsertter M.Ótemisuly atyndaǵy Oqýshylar saraıynyń jaıly zalynda uıymdastyrylady.
