Astanada jaryq jıi sónip qalady - Isekeshev sebebin aıtty
ASTANA. QazAqparat - Elorda basshysy Áset Isekeshev jaryqtyń sónip qalýy boıynsha myńǵa jýyq jaǵdaıǵa ne túrtki bolǵanyn túsindirdi, dep habarlaıdy «QazAqparat» HAA tilshisi.
«Ótken jyly jaryqtyń apattyq sónip qalýyna qatysty 956 jaǵdaı tirkeldi. Onyń bir bóligi bizdiń «Astana-REK» saldarynan bolǵanyn moıyndaımyz. Árbir jaǵdaı boıynsha biz tekseris júrgizip, birqatar qyzmetkerler laýazymynan bosatyldy. Osynyń arqasynda qyrkúıek aıynan bastap jaǵdaıdyń aıtarlyqtaı jaqsarǵanyn baıqap otyrmyz. Biraq, jaryqtyń sónip qalýy osy saladaǵy uıymdar men jeke qurylys kompanııalarynyń biliksizdigi tıimsiz jumysy sebep bolyp otyr», - dedi qala ákimi.
Onyń aıtýynsha, apattyq jaryqty sóndirýdiń sebebi ishki jelilerge baılanysty bolǵan.
«Bizge shaǵym kelip túsken kezde mamandarymyz «bul bizdiń nysandar ma, álde jeke me?» dep surap jatpaıdy. Biz qońyraý túsken úılerge baryp, jaryqty qosyp beremiz. Biraq, sonymen qatar, jumystyń sapasy pen paıdalanylýyna basqarýshy kompanııalar, PIK jaýapty. Biz olarmen de birlese jumys júrgizemiz», - dedi shahar basshysy.
Áset Isekeshev óz sózinde qalaǵa jaryq berý júıesin damytý boıynsha ákimdiktiń josparymen bólisti.
«Ótken jyly «Turan», «Jańajol», «Báıterek», «Eki», «Promzona» kishi stansalarynyń qurylysy men qaıta jóndeý jumystary aıaqtaldy. Apattyq jaǵdaılardy azaıtý úshin 81 bólýshi pýnkterge jóndeý júrgizilgen. Bıyl taǵy 10 transformatorlyq kishi stansa jóndelip, 6 jańa pýnkt salynady», - deıdi ol.
