Astanada jarty kúnde jaýyn-shashynnyń aılyq mólsheri jaýdy (FOTO)
ASTANA. QazAqparat - Keshe Astana qalasynda tolassyz jaýǵan jańbyr saldarynan birqatar kóshelerde kólik qozǵalysy shekteldi. Birneshe saǵat boıy toqtaýsyz jaýǵan jaýyn-shashynnyń áserinen keıbir kóshelerde kólik keptelisi paıda boldy.
Atap aıtqanda, B. Momyshuly dańǵylynan Daraboz kóshesine deıin: Oqýshylar saraıynyń janynda, A. Baıtursynov kóshesi men Táýelsizdik dańǵylynyń qıylysynda kólik qozǵalysy toqtatyldy.
Jol-patrýldik polıtsııa qyzmetkerleri kólik aǵymyn retteýde, - dep habarlaıdy Astana qalasynyń ІІD baspasóz qyzmeti.
Tabıǵat jaǵdaıyna baılanysty elordalyq kommýnaldyq qyzmetter kúsheıtilgen rejımde jumys isteýde. Astana qalasy Kommýnaldyq sharýashylyq basqarmasynyń habarlaýynsha, elordanyń úsh aýdanynda jınalǵan sýdy sorý úshin 60 mamandandyrylǵan tehnıka tartylǵan. Atap aıtqanda, arnaıy ılososty, vakýýmdy kólikter men sý sorý qurylǵysy bar MTZ-82 traktorlary.
Qazirgi ýaqytqa deıin birinshi aýysymda qyzmet etken kommýnaldyq jumysshylar 2609 m3 jańbyr sýyn soryp úlgerdi: «Almaty» aýdanynda 970 m3, «Esil» aýdanynda 789 m3, «Saryarqa» aýdanynda 850 m3.
«Qazgıdromet» RMK boljamynsha, Astanada aldaǵy kúnderi aýa raıy jaýyn-shashyndy bolady.
17 mamyrda kún ala bultty, túnde jáne tańerteń jańbyr jaýyp, kún kúrkireıdi. Batystan soqqan jeldiń jyldamdyǵy 9-14 m/s, keı jerlerde 15-20 m/s deıin kúsheıedi. Aýa temperatýrasy túnde +8+10°S , kúndiz +18+20°S bolady.
Dúısenbi kúni, 18 mamyrda ótkinshi jańbyr jaýyp, aýa temperatýrasy túnde +8+10°S, kúndiz +18+20°S bolady.
Seısenbi, 19 mamyr kúni de aýa raıy jaýyn-shashyndy bolady, ońtústik-batystan soqqan jeldiń jyldamdyǵy 9-14 m/s jetedi. Túnde aýa temperatýrasy +10+12°S, kúndiz +19+21°S deıin jylynady, dep habarlaıdy astana.kz. Muhtar Holdorbekovtyń fotosy
