Astanada jarnama mańdaıshalaryna biryńǵaı talaptar engizý usynyldy
ASTANA. QazAqparat - Astana qalalyq Sáýlet jáne qala qurylysy basqarmasy basshysynyń orynbasary Gúljan Kıvenova QR Parlamenti Májilisinde ótken dóńgelek ústelde elordadaǵy jarnama jáne ózge de mańdaıshalar úshin biryńǵaı ereje engizýdi usyndy, dep habarlaıdy QazAqparat.
«Biz kelisýge jáne salyqtyq alymǵa jatpaıtyn mańdaıshalardyń biryńǵaı reglamentin jasaýdy usynamyz. Máskeý tájirıbesi negizinde quzyrly organnyń saıtynda osyndaı mańdaıshalardyń biryńǵaı erejesin jarııalaý qajet dep esepteımiz. Árbir kásipker saıttan sol erejelerdi oqyp, mańdaıshalardy biryńǵaı reglamentke saı jasaı alady. Bizdiń qalada jarnama mańdaıshalary ala-qula bolǵandyqtan, árdaıym eskertýler alamyz. Ókinishke oraı, bul zańmen birizdilenbegen. Qandaıda bir shara qoldana almaımyz. Sol sebepti jarnama mańdaıshalaryna qatysty reglamentti jasaqtaý máselesin kóterý qajet», - dep atap ótti ol.
Onyń aıtýynsha, atalmysh reglamentti ákimdik Astananyń erekshe mártebesi týraly zańǵa engizýdi josparlaýda.
«Ókinishke oraı, ol tolyqtyrýdy eshkim qoldap otyrǵan joq. Mańdaıshalar tipti jarnama týraly zańmen de reglamenttelmegen», - dep atap ótti G. Kıvenova.
