Astanada «Jarqyn bolashaq» V respýblıkalyq «KATEV» qazaq tili olımpıadasy ótedi
ASTANA. 3 sáýir. QazAqparat - KATEV Halyqaralyq qoǵamdyq qorynyń uıymdastyrýymen 5-6 sáýir kúnderi Astanada jalpy orta bilim beretin mektepterdiń qazaq tobynda jáne ózge ult toptarynda oqıtyn 7-11-synyp oqýshylary arasynda «Jarqyn bolashaq» V respýblıkalyq «KATEV» qazaq tili olımpıadasy ótkiziledi.
Bul týraly «KATEV» halyqaralyq qoǵamdyq qorynyń baspasóz qyzmeti habarlady.
Olımpıadanyń maqsaty - memlekettik tildiń qoldanylý aıasyn keńeıtý jáne ony damytý, ári qazaq tili men ádebıeti pánderi boıynsha erekshe daryndy oqýshylardy anyqtaý jáne olarǵa qoldaý kórsetý. Sondaı-aq olımpıadany ótkizýdiń basty maqsattarynyń biri - qazaqsha sóıleýmen qatar, qazaq tilinde án aıtý, mánerlep oqý, ǵylymı jumys qorǵaý, shyǵarmashylyq qabiletin kórsetý, qazaq tili men qazaq ádebıetin jaqsy meńgerý arqyly Qazaqstannyń «jarqyn bolashaǵy» úshin aıanbaı qyzmet etetinin kórsetken naǵyz «segiz qyrly, bir syrly» jastarǵa erekshe qoldaý kórsetý bolyp tabylady.
Olımpıadada oqýshylardyń qazaq halqynyń tili, ádebıeti, salt-dástúri, tarıhy, mádenıeti sekildi ulttyq qundylyqtarǵa degen qyzyǵýshylyǵyn arttyrý, tulǵanyń óz-ózin damytýyna jáne qabiletin ushtaýǵa yqpal etý kózdeledi. Bıyl besinshi ret ótkizilip otyrǵan «Jarqyn bolashaq» olımpıadasynyń aqtyq básekesi (fınal) sáýirdiń 5-6 aralyǵynda Astana qalasynda ótedi.
«Jarqyn bolashaq» olımpıadasynda 5 konkýrs bar: «Tilshi ádebıetshiler», «Ánshi-bulbuldar», «Jas ǵalymdar», «Sóz sheberleri», «Jazýshylar».
Árbir baǵyt boıynsha Olımpıadanyń jeńimpazdary men júldegerleri anyqtalady. Olar «KATEV» Halyqaralyq qoǵamdyq qorynyń І, ІІ, ІІІ dárejeli dıplomdarymen jáne baǵaly syılyqtarmen marapattalady. Sondaı-aq olımpıadanyń eń joǵary nátıje kórsetken 11-synyp oqýshylaryna Súleıman Demırel ýnıversıtetiniń granty tabys etiledi. Baǵyttar boıynsha oryn alǵan oqýshylardyń muǵalimderi gramotalarmen marapattalady.
