Astanada «Jarqyn bolashaq» atty V respýblıkalyq qazaq tili olımpıadasynyń qorytyndylary shyǵaryldy
ASTANA. 6 sáýir. QazAqparat - Bir jyl boıy Qazaqstannyń túkpir-túkpirndegi 1000-nan astam mektepterdiń 5 myńdaı oqýshylary qatysqan «Jarqyn bolashaq» atty V respýblıkalyq qazaq tili olımpıadasy óskeleń urpaqtyń memlekettik til - qazaq tiline degen ystyq yqylasyn kórsetti.
Bul týraly búgin «Jarqyn bolashaq» V respýblıkalyq qazaq tili olımpıadasynyń jabylý saltanatynda KATEV Halyqaralyq qoǵamdyq qorynyń prezıdenti Mehmet Mesýt Ata málim etti.
Onyń aıtýynsha, bul bilim saıysyna qazaq balalarymen qatar, ózge ult ókilderiniń de belsene qatysyp, júldeli oryndardy ıelenýi qazaq tiliniń gúldenip kele jatqandyǵynyń belgisi.
«QR Memlekettik tili - qazaq tili - uly dalany meken etken baıyrǵy qazaq halqy men qazaqstandyq basqa da ult ókilderiniń tarıhı taǵdyryn toǵystyrǵan, teńdik pen tatýlyqty ustana otyryp, beıbit qoǵamdy qalyptastyrýǵa qol jetkizip otyrǵan birden-bir uly rámizi», - dep atap ótti ol.
Sharanyń maqsaty - memlekettik tildiń qoldanylý aıasyn keńeıtý jáne ony damytý, ári qazaq tili men ádebıeti pánderi boıynsha erekshe daryndy oqýshylardy anyqtaý jáne olarǵa qoldaý kórsetý. Sondaı-aq olımpıadany ótkizýdiń basty maqsattarynyń biri - qazaqsha sóıleýmen qatar, qazaq tilinde án aıtý, mánerlep oqý, ǵylymı jumys qorǵaý, shyǵarmashylyq qabiletin kórsetý, qazaq tili men qazaq ádebıetin jaqsy meńgerý arqyly Qazaqstannyń «jarqyn bolashaǵy» úshin aıanbaı qyzmet etetinin kórsetken naǵyz «segiz qyrly, bir syrly» jastarǵa erekshe qoldaý kórsetý bolyp tabylady.
Bıyl besinshi ret ótkizilip otyrǵan «Jarqyn bolashaq» olımpıadasynyń aqtyq básekesinde 16 oqýshy úzdik shyqty. Budan bólek, olımpıada aıasynda «Tilshi ádebıetshiler», «Ánshi-bulbuldar», «Jas ǵalymdar», «Sóz sheberleri», «Jazýshylar» degen 5 konkýrs boıynsha da úzdikter anyqtaldy. Olar «KATEV» Halyqaralyq qoǵamdyq qorynyń І, ІІ, ІІІ dárejeli dıplomdarymen jáne baǵaly syılyqtarmen marapattaldy.
Sondaı-aq olımpıadanyń eń joǵary nátıje kórsetken 11-synyp oqýshylaryna Súleıman Demırel ýnıversıtetiniń granty tabys etildi. Baǵyttar boıynsha oryn alǵan oqýshylardyń muǵalimderi gramotalarmen marapattalady.
