Astanada elektr jaryǵynyń tarıfi ózgerýi múmkin
ASTANA. KAZINFORM — Astanada elektr energııasynyń tarıfin kóterý máselesi qoǵamdyq tyńdaýda qaraldy.
Astana aımaqtyq elektrjelilik kompanııasynyń basqarma tóraǵasy Rýslan Abjanov 2026 jylǵy 5 maýsymnan bastap elektr qýatynyń ortasha tarıfin 31,18 teńgeden 35,07 teńgege deıin ósirýdi usynyp otyr.
Kompanııa málimetine saı, tarıftiń ósýine elektr energııasyn satyp alý men tasymaldaý qunynyń qymbattaýy sebep bolǵan. Sondaı-aq ulttyq elektr jelileriniń qyzmet aqysy, qýat naryǵyndaǵy tólemder men teńgerimdeýshi naryq shyǵyndary da ósken.
— 2025 jyldyń qańtarynan 2026 jyldyń sáýirine deıin kompanııa dıfferentsıaldy tarıfter saldarynan 3,5 mlrd teńgeden astam shyǵynǵa ushyraǵan. Buǵan qosa kommýnaldyq tarıfterdiń ósýine qoıylǵan ýaqytsha shekteý de áser etken, — deıdi Rýslan Abjanov.
Sondaı-aq elordadaǵy elektr tutyný kólemi aıtarlyqtaı artqan. Máselen 2025 jyldyń basynda kompanııamen 536 myńnan astam kelisimshart bolsa, 2026 jyldyń sáýirinde olardyń sany 603 myńnan asqan.
Rýslan Abjanov tarıf ósimi turǵyndar úshin orta eseppen 10 paıyz bolady dep otyr. Esep boıynsha bir bólmeli páterdegi aı saıynǵy tólem shamamen 383 teńgege, eki bólmeli páterde 766 teńgege, al úsh bólmeli páterde 1148 teńgege ulǵaıýy múmkin.
Sonymen qatar kompanııa jańa tarıf engizilgen kúnniń ózinde Astanadaǵy elektr baǵasy keı óńirlerden tómen bolatynyn málimdedi. Mysaly qazirgi tańda Aqtóbede elektr tarıfi QQS-pen birge 52 teńgeden, Qostanaıda 47 teńgeden asady.
Aıta keteıik, buǵan deıin, tarıf ósimi ınflıatsııa deńgeıi sheginde ǵana júrgiziletinin jazǵan edik.
