Astanada jáne bes oblysta joldar jabylyp, qozǵalys toqtady
ASTANA. QazAqparat - Astanada tynymsyz jaýǵan qar men qatty jeldiń saldarynan birqatar joldar jabyldy, dep habarlaıdy QazAqparat elorda ákimdiginiń resmı saıtyna silteme jasap.
«Senbi kúni keshki saǵat 19.30-dan bastap aýa raıynyń buzylýyna baılanysty (qar aralas jańbyr, yzǵyryq jel, kóktaıǵaq) Astana - Qaraǵandy, Astana - Qorǵaljyn, Astana - Qabanbaı batyr joldary barlyq avtokólik túrleri úshin jabyldy», - dep habarlaıdy iKomek qalalyq monıtorıng jáne shuǵyl áreket etý ortalyǵy.
Qozǵalys qaıta jandanǵan kezde qosymsha habarlanady.
24 qarasha kúni saǵat 18.00-de Pavlodar oblysynda respýblıkalyq jáne oblystyq mándegi birqatar joldar jabyldy, dep habarlaıdy «QazAvtoJol».
Almaty oblysyn Shyǵys Qazaqstanmen jalǵaıtyn Almaty - Óskemen (79-615 shaqyrymy, Qapshaǵaı beketi - ShQO shekarasy ýchaskesi) jáne Saryózek - Kóktal (15-65 shaqyrymy) joldarynda da qozǵalys toqtady.
Jambyl oblysynda da jol jabylǵan. Almaty - Tashkent - Termez (536-593 shaqyrymy - Aısha bıbi aýylynan Túrkistan oblysynyń shekarasyna deıin, 593-632 shaqyrymy - Jambyl oblysynyń shekarasynan Jaskeshý aýylyna deıin) avtojolynda qozǵalys toqtatyldy.
Sonymen birge, Shyǵys Qazaqstan men Qaraǵandy oblystarynda da joldar jabyldy.
