Astanada jańbyrdyń sońy qarǵa ulasady
ASTANA. QazAqparat - Sınoptıkter Astanada aldaǵy birneshe saǵattyń ishinde jańbyrdyń arty qarǵa ulasatynyn boljap otyr, dep habarlaıdy «QazAqparat» HAA «Qazgıdromet» RMK-nyń baspasóz qyzmetine silteme jasap.
«Aldaǵy 3 táýlikke berilgen aýa raıy boljamyna sáıkes, Astanada taıaý saǵattardyń ishinde jańbyrdyń sońy qarǵa ulasady. Eske salaıyq, ótken demalys kúnderi birneshe óńirde aýa raıynyń kúrt ózgerýine baılanysty eskertý jarııalanǵan bolatyn. Qazaqstan aýmaǵyna qar alyp kelýi múmkin tsıklondar jyljýda. Qazirdiń ózinde respýblıkanyń batysynda ornalasqan tsıklon batys jáne soltústik aımaqtarǵa qar men jańbyr túrindegi jaýyn-shashyn alyp keldi», - dep habarlady agenttikke sınoptıkter.
Sonymen qatar «Qazgıdromettiń» boljamyna qaraǵanda, ylǵaldy qar men kóktaıǵaq aldaǵy úsh táýlik boıy saqtalady. «Aldaǵy úsh táýlikte jańbyrdyń arty jıi qarǵa aýysyp otyrady. Tsıklonnyń jáne onymen baılanysty sýyq atmosfera aǵynynyń jyljýynan respýblıkanyń soltústik-shyǵysynda, soltústik, ortalyq, keıinnen shyǵys oblystarynda qar molynan jaýýy múmkin. Batystan soqqan jeldiń ekpini 23-28m/s-ke jetedi, keıbir jerlerde burqasyn, kóktaıǵaq bolady», - dep málimdedi «Qazgıdromet» RMK-dan.
Erteń, 25 qazan kúni Astanada kún bultty, ara-tura qar jaýyp, jaıaý burqasyn júredi. Jel batystan, soltústik-batystan sekýndyna 15-20 metr jyldamdyqpen soǵady. Aýa temperatýrasy túnde -3 jáne -5°S tóńireginde, kúndiz 0 -2°S nólden tómen bolady.
26 qazanda elordada kún qubylmaly, kóshpeli bult shyǵyp, túnde azdap qar jaýady. Jel soltústik-batystan 9-14 m/s jyldamdyqpen soǵady. Aýa temperatýrasy túnde -3 jáne -5°S nólden tómen, al kúndiz 0 jáne -2°S tóńireginde bolady.
