Astanada «jańbyr balalaryna» arnalǵan taǵy bir synyp ashyldy
ASTANA. QazAqparat - Aýtıst balalardy keı kezde «jańbyrdyń balalary» dep ataıdy. Psıholog mamandardyń aıtýynsha, olardyń arasynda shyǵarmashylyq jaǵynan daryndy adamdar jıi kezdesedi.
Sebebi olar bir iske tolyǵymen beriledi de, úlken jetistikterge jete alady. Biraq aýtıst balalarǵa ata-analardyń tarapynan, jalpy qoǵamnyń tarapynan únemi qoldaý qajet, dep habarlaıdy QazAqparat tilshisi.
Astanadaǵy №85 mektep-lıtseıinde aýtıst balalarǵa arnalǵan synyptyń ashylýy - sol qoldaýdyń bir kórinisi. Atalǵan joba «Bolashaq» korporatıvtik qorynyń bastamasymen iske asyp otyr. Synypta árbir balanyń óziniń orny bar. Sol jerde tıýtor, ıaǵnı arnaıy pedagogtar olarmen jumys istep, san alýan pánderge úıretedi. Sóıtip, aýtıst balalar birtindep basqa balalarmen otyryp, barlyǵyna ortaq synyptarǵa aýysa alady. 
«Arnaıy kabınette birneshe aımaq bar. Olar - jeke pánder aımaǵy, toptyq pánder aımaǵy, tynyǵý aımaǵy jáne ustazdyń jumys aımaǵy. Endi, bárimiz jaqsy bilemiz, aýtıst balalar bir náresege zeıin qoıyp, kóp otyra almaıdy. Sol sebepti sabaqtyń bir bóligin jeke pánder aımaǵynda ótkizsek, endi bir bóligin toptyq pánder aımaǵynda ótkizemiz. Sóıtip, onyń otyrǵan aımaǵyn únemi aýystyryp otyrý qajet. Árbir balanyń jeke oqytý baǵdarlamasy bar. Sosyn ondaı balalarǵa sýretteri bar kesteni únemi kórsetip otyrǵan durys. Mysaly, qazir biz sabaq oqımyz, sosyn taǵy bir sabaq, odan keıin úıge barýǵa bolady. Osynyń bárin arnaıy sýrettermen kórsetse, balalar basqa nársege alańdamaıdy. Al sabaqtan keıin demalyp, doppen oınaı alasyń, sekirýge bolady degen sýretterdi kórsetsek, qatty qýanyp ketedi», - deıdi tıýtor Álııa Erjanova. 
«Bolashaq» korporatıvtik qorynyń dırektory Dınara Sháıjúnisovanyń aıtýynsha, Astanada osymen besinshi kabınet ashylyp otyr. Jalpy, joba aıasynda Aqmola, Aqtóbe, Shyǵys Qazaqstan, Jambyl, Qaraǵandy, Pavlodar, Soltústik Qazaqstan men Túrkistan oblystarynda 20 kabınet ashý josparlanǵan.
«Negizgi maqsatymyz - aýtıst balany qoǵamnyń tolyqqandy múshesi etip shyǵarý. Máselen, bizdiń jobamyzda 12 jasqa deıin úıde otyrǵan balalar bar. Qazir olar aýyr mysaldardy sheship júr. Basqa balalardyń qatelikterin de kórsete alady. Bir qyzymyz basynda múldem beıimdele almady. Búginde ol myńdaǵan elementi bar pazldy jınap otyrady. Negizi, árbir balanyń jeke bir qasıeti bar. Biz sony ashyp, damytýǵa kómektesýimiz kerek. Basty maqsatymyz osy», - dedi D.Shaıjúnisova jýrnalısterge bergen suhbatynda.
Qor basshysynyń sózine qaraǵanda, atalǵan uıym jyl saıyn qysqy qaıyrymdylyq balyn ótkizip otyrady. Dál osy ispetti sharalardan jınalǵan aqshaǵa arnaıy kabınetter jasaqtalady.
