Astanada jańbyr quıyp tur: qutqarýshylar turǵyndarǵa eskertý jasady
ASTANA. KAZINFORM — Kún raıyna baılanysty kúndiz aýa temperatýrasy nólden joǵary bolyp, qar erıdi, al túnde kúrt sýytady. Sonyń saldarynan joldar men trotýarlarda kóktaıǵaq ornaıdy, dep habarlaıdy elorda ákimdiginiń resmı saıty.
Qalanyń kommýnaldyq qyzmeti turǵyndardyń qaýipsiz júrýin qamtamasyz etý úshin táýlik boıy toqtaýsyz jumys istep jatyr. Elordadan bir kúnde qar polıgondaryna 2 302 aýyr júk kóliginiń reısimen 35 myń tekshe metrden astam qar men muz shyǵaryldy. 6 aqpanǵa qaraǵan túni qalada qar men kóktaıǵaqty tazalaý úshin 1 400-den astam arnaıy tehnıka men 400-den asa jol jumysshysy jumyldyryldy. Turǵyndardyń qaýipsiz qozǵalysyn qamtamasyz etý úshin joldarǵa, trotýarlar men kóshelerge tehnıkalyq tuz sebiledi. Bul jumys táýlik boıy toqtaýsyz júrgiziledi.
«Qazgıdromet» RMK málimetinshe, 6 aqpan kúni Astanada qalyń qar jaýyp, kóktaıǵaq kútiledi.
— Túnde jáne tańerteń tuman, kúndiz burqasyn boljanyp otyr. Jel ońtústik-batystan soltústik-batysqa aýysyp, jyldamdyǵy 9-14 m/s, al tańerteń jáne kúndiz ekpini 15-20 m/s-qa deıin jetedi. Aýa temperatýrasy túnde jáne kúndiz -1…-3°S, kúndiz odan ári tómendeıdi. 7 aqpan kúni de boran soǵyp, qar jaýady. Jel ońtústik-batystan 9-14 m/s jyldamdyqpen soǵady. Aýa temperatýrasy túnde -17…-19°S, kúndiz -14…-16°S bolady, — delingen habarlamada.
Aýa raıynyń qubylýyna baılanysty Astana qalasynyń Tótenshe jaǵdaılar departamenti turǵyndardy saqtyq sharalaryn qatań saqtaýǵa shaqyrady. Daýyldy eskertýler men aýa raıynyń qolaısyzdyǵy, sondaı-aq kólik joldarynyń jabylýy týraly aqparatty SMS-habarlamalar, ınternet-resýrstar jáne áleýmettik jeliler arqyly qadaǵalaý qajet.
Qutqarýshylar qaýipsizdik erejelerin eske saldy:
- kóktaıǵaq kezinde abaılap, asyqpaı júrińiz;
- qatty jel nemese boran kezinde asa qajettilik bolmasa, ǵımarattan shyqpańyz;
- júrgizýshiler jolda qaýipsiz araqashyqtyqty saqtaýy tıis;
- órt qaýipsizdigi talaptaryn qatań saqtaý qajet.
Astana ákimdigi turǵyndardy jolda muqııat bolýǵa jáne múmkindiginshe alys saparǵa shyqpaýǵa shaqyrady. Tótenshe jaǵdaı týyndaǵan sátte 112 nómirine habarlasý qajet.
Osydan buryn erteń aýa raıynyń qolaısyzdyǵyna baılanysty birinshi aýysymnyń 0-9 synyp oqýshylary qashyqtan oqytý formatyna aýystyrylatyny anyqtaldy.