Astanada jańadan jaryq kórgen tarıhı kitaptardyń tanystyrylymy ótti
ASTANA. KAZINFORM – Búgin elordadaǵy Ulttyq akademııalyq kitaphanada jazýshy, ǵalym, professor Darhan Qydyráliniń «Mustafa», «Abyzdar amanaty», «Tamyr», «Núkte fılosofııasy» jáne qyrǵyz tilinde basylǵan «Tashqa jazylǵan taryh» atty kitaptary kópshilikke tanystyryldy. Іs-sharaǵa ǵalymdar, qalamgerler, zııaly qaýym ókilderi jáne Parlament depýtattary qatysty.
Óz sózinde Senat Tóraǵasy Máýlen Áshimbaev jańadan jaryq kórgen eńbekter ulttyq biregeılikti saqtaý jolynda tarıhı mańyzǵa ıe ekenin aıtty. Sondaı-aq ol atalǵan kitaptar týǵan halqynyń kemel keleshegi úshin qyzmet etken kórnekti tulǵalardyń ómiri men murasyn dáripteýge zor úles qosatynyna nazar aýdardy. Naqty tarıhı derekter men arhıv materıaldary qamtylǵan týyndylar oqyrman qaýymǵa ult úshin basyn báıgege tikken saıası qaıratkerlerdiń ómirine qatysty tyń málimetter usynady.
Sonymen qatar palata Spıkeri eldiń ótkeni, búgini jáne bolashaǵy onyń tarıhı murasymen tyǵyz baılanysty ekenin tilge tıek etti. Sondyqtan ult shejiresin júıeli zerttep, zerdeleýdiń mańyzy zor. Memleket basshysynyń tarıhı sanany jańǵyrtý jáne tarıhty dáripteý baǵytyndaǵy tapsyrmasyna sáıkes Senat bul salaǵa basa mán berip keledi.
«Prezıdentimiz Qasym-Jomart Toqaevtyń tapsyrmasy boıynsha elimizdiń akademııalyq úlgidegi jańa tarıhyn jazý úshin júıeli jumys júrgizilip keledi. Soǵan sáıkes otandyq ǵalymdar men tarıhshylar ejelgi zamannan búginge deıingi aralyqty qamtıtyn jeti tomdyq aýqymdy eńbek ázirlep jatyr. Kóptomdyqtyń basty maqsaty –– Táýelsizdik shejiresin tereń túsinip, tarıhymyzdy obektıvti túrde qabyldaýdy qalyptastyrý. Munyń bári búgin jaryq kórip otyrǵan «Mustafa», «Abyzdar amanaty», «Tamyr», «Núkte fılosofııasy» jáne «Tashqa jazylǵan taryh» kitaptarynyń negizgi ıdeıasymen úndes ekenin atap ótken jón. Ult tarıhy men uly tulǵalarymyzdyń ómiri tereń zerdelengen bul eńbekter aldaǵy ýaqytta memlekettiligimizdi nyǵaıtýǵa jáne ulttyq kodymyzdy saqtaýǵa qyzmet etedi dep senemiz», – dedi Máýlen Áshimbaev.
Sondaı-aq is-shara barysynda kórnekti memleket jáne qoǵam qaıratkerleri, zııaly qaýym ókilderi, ǵalymdar, jazýshylar jáne jýrnalıster sóz sóılep, jańa eńbekterdiń máni men mańyzy týraly oı órbitti.
