Astanada jańadan tórt meshit salynady
ASTANA. QazAqparat - Astanada jańadan tórt meshit salynady. Bul týraly «Zaıyrly qoǵam: din men dástúr ushtastyǵy» taqyrybynda ótken konferentsııada Astana qalasynyń din isteri jónindegi basqarma basshysy Jorabek Dáýrenov málim etti, dep habarlady astana.kz.
«Sońǵy bes jylda meshit salýǵa 4 jer ýchaskesi bólindi. Atap aıtqanda, «Kóktal-1», «Kóktal-2», «Óndiris» jáne «Ilınka» kentterinde. Jalpy alǵanda, eger keler jyly qurylys jumystary qolǵa alynsa, Astanadaǵy meshitter sany 10-11 jetedi», - dedi Jorabek Dáýrenov. Onyń aıtýynsha, elordada Qazaqstannyń ózge óńirlerimen salystyrǵanda dinı nysandardyń qurylysy boıynsha belsendilik baıqalmaıdy. «Mysaly, Ońtústik Qazaqstanda myńǵa jýyq meshit bar, sonyń ishinde 20-30-y sońǵy úsh-tórt jylda salynǵan, al Astanada sońǵy jeti jylda meshit sany 4-ten 8 deıin artqan», - dedi Jorabek Dáýrenov. Eske salaıyq, Astanada «Zaıyrly qoǵam: din men dástúr ushtastyǵy» atty úsh kúndik semınary ótip jatyr. Shara Dinı ekstremızm men terrorızmdi aldyn alý salasynda qyzmet atqaratyn memlekettik mekemeler qyzmetkerleriniń bilimin nyǵaıtýǵa, biliktiligin jáne dinı saýattylyǵyn arttyrýǵa baǵyttalǵan. Semınar aıasynda din salasyndaǵy zańnama, dástúrli jáne dástúrli emes dinı birlestikterdiń elimizdegi qyzmeti qaralyp, Qazaqstannyń memlekettik-konfessııalyq saıasaty túsindiriledi.
