Astanada jańadan balalar aýrýhanasy salynady

ASTANA. QazAqparat – Elordadaǵy Esil jáne Nura aýdandarynda bala sanynyń artýyna baılanysty №4 balalar aýrýhanasyn salý josparlanyp otyr. Bul joba qazir pysyqtalyp jatyr, dep habarlaıdy QazAqparat tilshisi.

Qala ákimdigi «QazAqparat» HAA-nyń saýalyna bergen jaýabynda aıtylǵandaı, qazir Astanada úsh balalar statsıonary bar, olardaǵy naýqasty qabyldaıtyn bólmeler 98 paıyzǵa jabdyqtalǵan. Jyl saıyn qalada jergilikti bıýdjet esebinen materıaldyq-tehnıkalyq jaraqtandyrý iske asyrylyp jatyr.

Sonymen qatar balalar travmatologııalyq pýnktiniń júktemesin azaıtý baǵytynda №2 qalalyq kópsalaly aýrýhanasynyń bazasynda tıisti qabyldaý-dıagnostıkalyq keshenniń qurylysy júrip jatyr.

«Munymen qosa, Astana qalasynyń Esil jáne Nura aýdandarynda jumys istep turǵan aýrýhanalarǵa júktemeniń artýyna jáne balalar sanynyń ósýine baılanysty jańa balalar (№4) aýrýhanasynyń jobasy pysyqtalyp jatyr», - delingen ákimdik málimetinde.