Astanada Jańa jyldy merekeleýge oraı 38 shyrsha ornatyldy
ASTANA. QazAqparat - Astanada Jańa jyldy merekeleý aıasynda 38 shyrsha ornatyldy. Atap aıtqanda, Almaty aýdanynda - 24, Saryarqa aýdanynda - 5 jáne Esil aýdanynda - 9 shyrsha qoıyldy, dep habarlanǵan elorda ákimdiginiń resmı saıtynda.
Sonymen qatar qalada shaǵyn sáýlet músinderi qoıylyp, ǵımarattardyń qasbetteri bezendirildi, ıllıýmınatsııalyq arkalar men kronshteınder ornatyldy. Kóshelerdiń boıynda, turǵyn jáne ákimshilik ǵımarattardyń qasbetteri oıynshyqtarmen, qar ushqyndarymen, sharlarmen árlendi. Turan dańǵyly, Orynbor kóshesi, Qabanbaı batyr dańǵyly men «Astana-Báıterek» gúlzaryndaǵy aǵashtar, QR Úkimetiniń aldyndaǵy jaıaý júrginshiler kópiri, Dóńgelek alań arqyly ótetin kópir, elordalyq tsırk aldyndaǵy gúlzar, Ǵashyqtar saıabaǵy jáne Araı saıabaǵy bezendirildi. Esil aýdanynda 400-den astam shaǵyn jáne orta bıznes sýbektisi nysandarynyń qasbetterin Jańa jylǵa oraı rásimdedi. Esil ózeniniń jaǵalaýynda M.Ótemisuly atyndaǵy Oqýshylar saraıynyń janynda balalarǵa arnalǵan eki syrǵanaq jasalady. Sondaı-aq konkı tebýdi unatatyndar úshin Aqbulaq ózeninde jáne «Jeruıyq» parkinde úsh ashyq muz aıdyny, 7 mekteptiń aýmaǵynda mekeme janyndaǵy korttarda 9 syrǵanaq ashylady. Eske salaıyq, jańa jyldy merekeleý aıasynda elimizde 1-4 qańtar jáne Rojdestvo meıramy atalyp ótiletin 7 qańtar demalys kúnderi bolyp jarııalandy.
