Astanada jylý qýaty artady: jańa stantsııa men qazandyqtar iske qosylady
ASTANA. KAZINFORM — Astana qalasynyń ákimi Jeńis Qasymbek Instagram-daǵy paraqshasynda elordany jylýmen jabdyqtaý salasynda iri jobalar júzege asyrylyp jatqany týraly jazdy.
Jeńis Qasymbektiń sózinshe, elordanyń jylý-energetıkalyq ınfraqurylymyn damytý baǵytynda júıeli jumys júrip jatyr.
— Qalanyń ósý qarqynyn eskere otyryp, jylý qýatyn arttyryp, qoldanystaǵy nysandardy jańǵyrtyp, jańa turǵyn úı keshenderi men áleýmettik nysandardy qosýǵa qajetti rezerv qalyptastyryp kelemiz. Sonymen qatar aldaǵy jylytý maýsymyna keshendi daıyndyq júrip jatyr, — dedi ol.
Ákim Astanadaǵy «Telman» gaz jylý stantsııasynyń qurylysy 76%-ǵa aıaqtalǵanyn aıtty.
— «Telman» gaz jylý stantsııasynyń qurylysy qarqyndy júrip jatyr. Bul nysan elordanyń bolashaqtaǵy qurylys aımaqtaryn senimdi ári úzdiksiz jylýmen qamtamasyz etýge, jylýmen jabdyqtaý júıesiniń ótkizý qabiletin arttyrýǵa jáne jańa turǵyn úı keshenderi men áleýmettik nysandardy qosýǵa qajetti jylý qýatynyń rezervin qalyptastyrýǵa múmkindik beredi. Búginde nysannyń qurylysqa daıyndyq deńgeıi 76%-dy quraıdy. Sol sııaqty JEO-2-degi sý jylytý qazandyǵyn keńeıtý jáne №7, №8 sý jylytý qazandyqtaryn ornatý arqyly qaıta jańǵyrtý jumysy júrip jatyr. Jobany iske asyrý qalanyń negizgi jylý kózderiniń biriniń qýatyn arttyryp, júıeniń senimdiligin kúsheıtýge jáne jańa turǵyn úı men áleýmettik nysandardy jylý júıesine qosýǵa múmkindik beredi, — dedi Jeńis Qasymbek.
Qala basshysy atap ótkendeı, qalanyń energetıkalyq kásiporyndary jylytý maýsymyna daıyndyq aıasynda josparly jóndeý jumysyn qatar júrgizip jatyr. JEO-1 jáne JEO-2-degi úsh qazandyqqa, bir týrbınaǵa, bir transformatorǵa jáne eki sý jylytý qazandyǵyna kúrdeli jóndeý júrgizý, sondaı-aq qosalqy jabdyqtardy jóndeý josparlanǵan.
Sondaı-aq, bıyl 7,5 km jylý jelisi kúrdeli jóndeýden ótkizilip, qaıta jańǵyrtylady. Sonymen birge, 67,4 km áýe jáne kabel jelisin, 68 taratý jáne transformatorlyq qosalqy pýnktini, elektr jelisi ınfraqurylymynyń ózge de nysandaryn jóndeý josparlanyp otyr.
Elordany gazdandyrý jumysy da júıeli túrde júrip jatyr. Qazirgi ýaqytta gazben jabdyqtaý júıesine 14,4 myń abonent qosyldy. Gazdandyrý jumysy Kóktal-1, Kóktal-2, Agroqalashyq, Temirjolshylar, Ónerkásiptik, Ońtústik-Shyǵys, Kúıgenjar, Mıchýrıno, Internatsıonalnyı, Family Village, Vela Village, Úrker, Telman, Kirpishti, Shubar, Aqbıdaı, Qazaqaýyl eldi mekenderi men shaǵyn aýdandaryn, sondaı-aq Potanın kóshesi mańyndaǵy qalanyń eski bóligin qamtydy.
JEO-1 men JEO-2-degi 16 qazandyq gazǵa kóshirildi, 23 áleýmettik nysan gazben jabdyqtaý júıesine qosyldy.
Bıyl «QazaqGaz Aimaq» AQ-nyń ınvestıtsııalyq qarajaty esebinen Qazqalashyq eldi mekeninde gazben jabdyqtaý jelileriniń qurylysyn bastaý josparlanyp otyr. Sonymen qatar, Óndiris eldi mekenin gazdandyrý jobasy tolyq daıyn kúıinde paıdalanýǵa beriledi.
— Bul jobalardyń barlyǵy elordanyń ınjenerlik ınfraqurylymynyń senimdiligin arttyrýǵa, qajetti qýat rezervin qalyptastyrýǵa jáne qarqyndy damyp kele jatqan qalany turaqty jylýmen, elektrmen jáne gazben qamtamasyz etýge baǵyttalǵan, – dep túıindedi Jeńis Qasymbek.
Osyǵan deıin Energetıka mınıstrligi jylytý maýsymynyń qorytyndysyn shyǵarǵanyn jazǵanbyz.
