Astanada jańa jyldyq kontsert ótip jatyr
ASTANA. KAZINFORM - Jańa jyl qarsańynda, ıaǵnı 31 jeltoqsannan 1 qańtarǵa qaraǵan túni Astananyń úsh ashyq alańynda merekelik kontsertter uıymdastyrylyp, onda estrada juldyzdary óner kórsetip jatyr, dep jazdy qala ákimdiginiń resmı saıty.
Elordanyń alty aýdanynda muz aıdyndary, syrǵanaqtar, bezendirilgen shyrshalar, shaǵyn arhıtektýralyq músinder, fotoaımaqtar jáne t.b. qazirdiń ózinde qala turǵyndarynyń qýanyshyna aınaldy.
Otandyq estrada juldyzdary qalalyq alańda, EKSPO halyqaralyq kórme ortalyǵynyń aldynda jáne «Qazaq eli» monýmenti janyndaǵy alańda hıt ánderin oryndap jatyr.
Ánshilerdiń qatarynda Almas Kishkenbaev, Ayree, Erkesh Hasen, Beıbit Qorǵan, Qaırat Baekenov, Zarına Omarova, Ilhan Ihsan, Qurmash Mahan, Marjan Arapbaeva, Álisher Kárimov, «Zaman» jáne «Melomen» toptary, Ádilet Jaýǵashar, Altynshash Muqataeva, Qarakesek jáne basqa da óner qaıratkerleri bar. Merekelik kontsertke kez kelgen adam qatysyp, kóńil kótere alady.
Kontsertter túngi saǵat 2-ge deıin ótedi.
Prezıdenttiń jańajyldyq quttyqtaýyn Astana men Almaty turǵyndary LED ekrandardan tyńdaǵanyn jazǵan bolatynbyz.