Astanada Jańa jyl túni 48 lokatsııada qaýipsizdik qamtamasyz etildi
ASTANA. KAZINFORM — Astanada Jańa jyl túni qoǵamdyq tártip pen qaýipsizdikti qamtamasyz etý úshin 3 myńnan astam polıtsııa qyzmetkeri kúsheıtilgen rejımde kezekshilik etti. Qala aýmaǵynda ótken merekelik is-sharalar polıtsııanyń qatań baqylaýymen ótti. Bul týraly Astana qalasynyń ákimdigi málim etti.
Astana qalasynda 2026 jyldy qarsy alýǵa arnalǵan aýqymdy merekelik is-sharalar ótti. Olardyń qataryna jappaı halyqtyq serýender, kontserttik baǵdarlamalar jáne qalanyń ártúrli oryndarynda uıymdastyrylǵan pırotehnıkalyq shoýlar kirdi. Qoǵamdyq tártip pen azamattardyń qaýipsizdigin qamtamasyz etý maqsatynda Іshki ister organdarynyń jeke quramy aldyn ala kúsheıtilgen qyzmet atqarý rejımine kóshirildi.
Astana qalasy Polıtsııa departamenti Ákimshilik polıtsııa basqarmasy bastyǵynyń orynbasary, polıtsııa podpolkovnıgi Nurlan Qaparovtyń aıtýynsha, elorda turǵyndary men qonaqtarynyń sanynyń artýy eskerile otyryp, qala aýmaǵynda patrýldeý aıtarlyqtaı kúsheıtildi. Erekshe nazar merekelik is-sharalar ótetin oryndarǵa, sondaı-aq adamdar kóp shoǵyrlanatyn aýmaqtarǵa (saıabaqtar, skverler, saýda-oıyn-saýyq ortalyqtary jáne kóńil kóterý oryndaryna) bólindi. Sonymen qatar asa mańyzdy jáne strategııalyq nysandarda da patrýldeý uıymdastyryldy.
— Qalanyń negizgi lokatsııalarynda polıtsııa qyzmetkerleriniń táýlik boıǵy kezekshiligi qamtamasyz etildi. Bul sharalar qoǵamdyq tártipti saqtaý men azamattardyń qaýipsizdigin qamtamasyz etýge baǵyttalǵan. Polıtsııa jedel jaǵdaıdy turaqty baqylaýda ustap, yqtımal oqıǵalarǵa der kezinde áreket etti. Qoǵamdyq tártipti qamtamasyz etýge barlyǵy 3 093 ishki ister organdarynyń qyzmetkeri jumyldyryldy, onyń ishinde Qazaqstan Respýblıkasy Ulttyq ulanynyń 450 áskerı qyzmetshisi bar. Sonymen qatar 300 birlik tehnıka jumyldyryldy. Jappaı merekelik is-sharalar elordanyń barlyq aýdandarynda ornalasqan 48 lokatsııada ótti, — deıdi polıtsııa qyzmetkeri.
Vedomstvo ókiliniń málimetinshe, 31 jeltoqsan kúni kúndiz turǵyn alaptar men qalalyq saıabaqtarda merekelik kontsertter ótip, qala turǵyndaryna kóterińki kóńil-kúı syılady. Al keshki jáne túngi ýaqytta negizgi kontserttik baǵdarlamalar «Qazaq eli» alańynda, EKSPO aýmaǵynda jáne qalalyq ákimdik alańda uıymdastyryldy.
2026 jylǵy 1 qańtar kúni saǵat 00:00–de Botanıkalyq baqta jáne Ortalyq saıabaqta pırotehnıkalyq shoý ótkizildi. Barlyq is-shara kúsheıtilgen patrýldeý jaǵdaıynda ótip, qatysýshylardyń qaýipsizdigi tolyq qamtamasyz etildi. Sonyń nátıjesinde elorda turǵyndary men qonaqtary merekeni jaıly ári qaýipsiz jaǵdaıda qarsy aldy.
Qoǵamdyq tártipti qorǵaýǵa Polıtsııa departamentiniń jáne Ortalyq apparattyń qyzmetkerleri tartyldy.
— Mereke qarsańynda jáne mereke kúnderi jedel-profılaktıkalyq is-sharalar kesheni júzege asyryldy. Atap aıtqanda, 26-28 jeltoqsan aralyǵynda respýblıkalyq «Quqyqtyq tártip» jedel-profılaktıkalyq is-sharasy ótkizildi. Sondaı-aq, belgilengen merzimderde «Shyrsha» jáne «Pırotehnıka» is-sharalary uıymdastyryldy. Jedel jaǵdaıdy baqylaý turaqty túrde beınebaqylaý júıeleri arqyly júzege asyryldy. Jedel basqarý ortalyǵyna 47 myńnan astam beınebaqylaý kamerasy qosylǵan. Bul adamdar kóp jınalatyn oryndardaǵy jaǵdaıdy qadaǵalaýǵa jáne yqtımal oqıǵalarǵa jedel áreket etýge múmkindik berdi, — deıdi Nurlan Qaparov.
Ol sóz sońynda jalpy qabyldanǵan sharalar mereke kúnderi elordada jedel jaǵdaıdyń turaqtylyǵyn saqtaýǵa, qoǵamdyq tártiptiń óreskel buzylýyna jol bermeýge jáne qala turǵyndary men qonaqtarynyń qaýipsizdigin tolyq qamtamasyz etýge múmkindik bergenin erekshe atap ótti.
Aıta keteıik, Jańa jylda polıtsııaǵa 11 myńnan astam qońyraý túsken.