Astanada jańa jaǵajaı ashylady
ASTANA. QazAqparat - Astana qalasy Tabıǵı resýrstar jáne tabıǵat paıdalanýdy retteý basqarmasynyń málimetine sáıkes, elordada jańa jaǵajaıdyń qurylysy júzege asyrylady. Jazǵy demalys orny Kúıgenjar aýylynda salynady. Syıymdylyǵy 2250 adamdy quramaq. Bul týraly astana.gov.kz resmı saıty habarlady.
Qazirgi ýaqytta joba memlekettik saraptamadan ótkizilý ústinde, qorytyndy 10 shildede shyǵady dep kútilýde.
Jospar boıynsha jaǵajaı birneshe aýmaqtan turatyn bolady. Birinshi aýmaqqa jalpy aýdany 2,05 gektarlyq akvatorııa jáne uzyndyǵy 470 metrlik jaǵalaý kiredi. Ekinshi aýmaqqa jalpy aýdany 1,46 gektardy quraıtyn qumdaýyt jaǵajaı enedi. Ol jerde shezlong, qolshatyr, kereýet sekildi barlyq qajettilikter ornatylady.
Jaǵajaıda múmkindigi shekteýli jandardyń sýǵa túsýi de qarastyrylmaq. Osy maqsatta arnaıy pandýs jasalady. Balalar úshin tereńdigi 0,5-0,7 metrden aspaıtyn sýǵa túsý aýmaǵy bolady. Qaýipsizdik maqsatynda jaǵalaý boıynda qutqarý munaralary salynady.
Sonymen qatar, taǵy bir qosymsha aýmaq jasaý kózdelgen. Oǵan halyqqa qyzmet kórsetý mekemeleri, demalys oryndary, úıler, jasyl alqap, medpýnkt, qutqarýshylar beketi enedi. Belsendi demalysty unatatyndar úshin sporttyq aýmaq salynady. Atalmysh aýmaqta strıtbol, ústel tennısi, skeıtbordıng, voleıbol, shaǵyn fýtbol, badmınton sekildi buqaralyq sport túrlerimen shuǵyldanýǵa bolady.
Basqarmanyń habarlaýynsha, atalmysh jaǵajaı kelesi jyly jazda paıdalanýǵa berilmek.
