Astanada «jańa vırýs» tarady ma: Densaýlyq saqtaý basqarmasy jaýap berdi
ASTANA. KAZINFORM — Astana turǵyndary áleýmettik jelilerde «jańa vırýs» taraǵanyn aıtyp, bir-birine uqsas belgiler baıqalyp jatqanyn jazyp jatyr. Osyǵan baılanysty Kazinform tilshisi Astana qalasynyń Qoǵamdyq densaýlyq saqtaý basqarmasynan máseleniń mán-jaıyn anyqtady.
Áleýmettik jeli qoldanýshylary tamaqtyń aýyrýy, murynnyń bitýi jáne JRVI-ge tán ózge de belgiler týraly jazyp jatyr. Keıbir turǵyndar aýrýdyń dene qyzýynsyz ótip jatqanyn da atap ótken.
Kazinform redaktsııasynyń saýalyna jaýap bergen vedomstvonyń málimetinshe, qazirgi ýaqytta tynys joldary aýrýlarynyń ádetten tys nemese aýyr ótý belgileri baıqalmaıdy.
— Kóp jaǵdaıda aýrý JRVI-diń ádettegi klınıkalyq kórinisi sheńberinde ótedi. Sonymen qatar keıbir naýqastar ınfektsııany aýyrlaý sezinýi múmkin. Bul ásirese sozylmaly aýrýlary, ımmýnıteti tómen jáne basqa da qaýip faktorlary bar adamdarǵa qatysty, — dep habarlady basqarma.
JRVI-men aýyratyndar sany artty ma?
Basqarmanyń baspasóz qyzmetiniń málimetinshe, Astanada JRVI belgilerimen medıtsınalyq kómekke júgingender sany ósken.
Vedomstvonyń deregine sáıkes, 2026 jylǵy 4-10 qyrkúıek aralyǵynda elordada 3354-ke jýyq JRVI jaǵdaıy tirkelgen. Bul ótken jyldyń sáıkes kezeńimen salystyrǵanda 31%-ǵa az. Byltyr osy aralyqta 4638 jaǵdaı tirkelgen.
Aıta keteıik, jaqynda kúzde qandaı vırýstar taraıdy jáne olardan qalaı saqtanýǵa bolatynyń jazǵan edik.
