Astanada jańa úlgidegi meshit ashylady
Meshittiń bas ımamy Jaqııaqajy Ismaılovtyń aıtýynsha, jańa meshit jergilikti xalyq úshin yńǵaıly jerde tur. Úlken avtoturaǵy da bar.
«Meshitimiz Orazanyń qarsańynda ashylǵaly otyr. Osy jerde taraýyq namaz oqylady. Halyq kúnimen, túnimen qulshylyq jasaıdy. Qadyr túninde de myńdaǵan adam kelip, qulshylyq jasaı alady. Erteń, 11 mamyrda saǵat 10:00-nyń kezinde búkil xalyqty jınap, jańa meshitimizdi ashamyz», - dedi J.Ismaılov QazAqparat tilshisine bergen suxbatynda.
Aıta keteıik, avangard úlgisinde salynǵan jańa meshitke Yryskeldi qajynyń aty berilip otyr. Meshittiń kireberisinde shaǵyn avtoturaq bar. Búıirinde taǵy 300 kólik syıatyn turaq ornalasqan. Al meshittiń aınalasynda birneshe kún panelderin ornatyp qoıǵan. Kúnqaǵarlardyń shatyrynda da panelder bar. Sonyń arqasynda jańa meshitti kún energııasymen tolyǵymen qamtamasyz etýge bolady.
Elektrık mamandardyń aıtýynsha, kún panelderiniń qýattylyǵy sonsha, artyq energııany qalalyq jelilerge satýǵa tolyq múmkindik bar.
«Aýa-raıy jaqsy bolyp, kún shyǵyp turǵanda 200 KVt óndirýge bolady. Sonyń 30-40 protsenti meshitke tolyǵymen jetedi. Qalǵany qalaǵa. Endi, túnde qalanyń ózinen alamyz ǵoı. Ol kezde 20-30 Kvt qajet. Sonda kúndiz 150 Kvt-ty qalaǵa berip, túnde ary ketse 50 KVt alsaq, 100 KVt-tan astamyn qalaǵa berip otyramyz. Jalpy, jańa meshitte energııa únemdeý texnologııalaryn qoldaný jaǵy jaqsy eskerilgen», - deıdi olar.
Meshittiń qurylysy bastalǵanda jobalaýshylar jańa nysannyń avangard úlgisinde bolatyny jaıynda aıtqan bolatyn. Sáýletshi Saǵyndyq Janbolatovtyń sózine qaraǵanda, búginde Qazaqstanda meshitterdiń eki túri bar. Ol - ózbek jáne tatar úlgisindegi meshitter.
«Soltústik Qazaqstanda, kóbinese, tatar úlgisinde salynady. Al ońtústikte ózbek pen ıran stılin ustanady. Astanadaǵy meshit taza qazaq stıli men avangardtyń qosyndysy bolyp sanalady. Negizi, ondaı konstrýktsııalar din qaǵıdattaryna qaıshy kelmeıdi. Osy ispetti meshitter Malaızııa men Germanııada bar», - deıdi S. Janbolatov.
