Astanada jańa turǵyn úı baǵdarlamasy qabyldanady- ákim

ASTANA. QazAqparat - Astana ákimdiginde qala aktıvi «Prezıdenttiń bes áleýmettik bastamasyn» júzege asyrý mehanızmderin talqylady, dep habarlaıdy elorda ákimdiginiń resmı saıty.

Qala aktıviniń otyrysy barysynda elorda ákimi Áset Isekeshev «20-7-25» áleýmettik bastamasynyń mańyzdylyǵyna toqtalyp ótti.

«Memleket basshysy atap ótkendeı, búgingi tańdaǵy ózekti máselelerdiń biri - «áleýmettik mańyzdylyq problemasy». «20-7-25» áleýmettik baǵdarlamasy turǵyn ıpotekasynyń qalyń buqaraǵa qoljetimdiligin joǵarylatyp, turǵyn úı sektoryna jańa dem beredi. Endi jumysy bar ár turǵyn úshin talaptary yńǵaıly ıpotekalyq zaımdy ala alady. Bul bank sektoryn jandandyryp qoımaı, turǵyn úı naryǵynyń belsendi túrde damýyna serpin berip, óndiristiń damýyna sep bolady. Osy rette jańa jumys oryndary da qurylady», - dedi ákim.

Áset Isekeshev, sondaı-aq aldaǵy bir aıdyń kóleminde Astanada jańa turǵyn úı baǵdarlamasynyń qabyldanatynyn jetkizdi.

«Elbasynyń jańa áleýmettik bastamasyn esepke ala otyryp, men ózimniń orynbasarym Sergeı Horoshýnǵa, basqarma basshylaryna qalalyq qoljetimdi baspana baǵdarlamasyn ázirleýdi tapsyrdym. Ol baǵdarlamada Memleket basshysy kótergen bastamanyń erekshelikteri eskerilýi tıis. Bir aıdyń ishinde biz aldaǵy bes jylda salynatyn turǵyn úıdiń, kommýnıkatsııalardyń kólemin, olardyń ornalasatyn aýdandaryn anyqtap alýymyz kerek. Baǵdarlama daıyn máslıhattyń qaraýynan soń qabyldanatyn bolady», - dedi Áset Isekeshev.

Aıta keteıik, 2018 jyly turǵyn úı baǵdarlamalaryn júzege asyrý aıasynda Astanada jalpy aýdany 78,3 myń sharshy metrdi quraıtyn 6 turǵyn úı kesheni paıdalanýǵa beriledi dep josparlanýda. Osylaısha, kezekte turǵan azamattar úshin elordanyń kommýnaldyq turǵyn úı qorynan, sondaı-aq «Nurly jer» turǵyn úı qurylysy baǵdarlamasynyń aıasynda 1500-ge tarta páter usynylady dep josparlanǵan.