Astanada jańa týǵan nárestelerge arnalǵan syılyq nelikten barlyǵyna berilmeıdi
ASTANA. QazAqparat - Astana qalasynyń Qoǵamdyq densaýlyq saqtaý basqarmasy jańa týǵan shaqalaqtardyń barlyǵyna birdeı syılyqtyń berilmeýi týraly áleýmettik jelilerdegi habarlamalarǵa túsinik berdi.
«Búgin tanys kelinshek Ana men bala ortalyǵynda bosandy. Aıtýynsha, onda adam óte kóp. Sábılerge arnalǵan eshqandaı syılyq berilip jatqan joq», - dep jazdy Aıdar Batyr esimdi azamat Feısbýktegi toptardyń birine.
Qalalyq Qoǵamdyq densaýlyq saqtaý basqarmasy jańa týǵan shaqalaqtarǵa syılyq berý aktsııasy elorda kúnine oraı birkúndik bolǵanyn atap ótti.
«Atalmysh aktsııa birkúndik boldy. Ol Astana qalasynyń barlyq perınataldyq ortalyqtarynda 6 shilde kúni saǵat 00.00-den 7 shilde kúngi saǵat 00.00-ge deıin jalǵasty. Aktsııa Astananyń 20 jyldyq mereıtoıyna arnaldy», - delingen basqarmanyń habarlamasynda.
Málim etilgendeı, osy kúni bosanǵan áıelderdiń barlyǵyna sábıge qajetti kıim-keshekter men zattardyń jıyntyǵy tartý etildi.
Basqarmanyń atap ótýinshe, 2018 jyldyń 1 tamyzynan bastap mundaı syılyqtar jańadan bosanǵan jalǵyzbasty analarǵa, kópbalaly analarǵa jáne múgedek áıelderge beriletin bolady.
Aıta keteıik, buǵan deıin Astana ákimdigi jańa dástúr qalyptastyrǵany, endigide qalada týǵan árbir sábıge 17 zattan turatyn jıyntyq syıǵa beriletini týraly aqparat taratylǵan bolatyn. Jıyntyq sómkege: toqyma keýdeshe, toqylǵan bas kıim, qolǵaptar, toqylǵan jamylǵy, 2 jaıalyq, 2 jeıde, 2 telpek, 4 jup shulyq, konvert, sábıdiń aljapqyshy, sómke jáne t.b. endi.
