Astanada jańa teleradıokeshen paıda bolady - mınıstr Asqar Jumaǵalıev
ASTANA. Maýsymnyń 3-i. QazAqparat /Gúlnár Jandaǵulova/ - Baılanys jáne aqparat mınıstrligi jaqyn arada Astanada jańa teleradıokeshen ashady. Bul týraly mınıstrlik basshysy Asqar Jumaǵalıev beısenbi, maýsymnyń 3-i kúni óz blogynda habarlady.
Ótken demalys kúni Baılanys jáne aqparat mınıstri Asqar Jumaǵalıevtiń Bas redaktorlar klýbynyń múshelerimen kezdesý ótkizgenin QazAqparat buǵan deıin habarlaǵan bolatyn.
Kezdesý barysynda mańyzdy problema - ýaqyt ótken soń magnıti joǵalatyn úlbirler emes, sandyq muraǵattar saqtalatyn zamanaýı beınemuraǵattyń joqtyǵy kóterildi. Mınıstr, ózi basqaratyn vedomstvosynyń bul máselemen aınalysyp jatqanyn aıtty. «Jaqyn arada Astanada biz jańa teleradıokeshen ashqaly otyrmyz. Onda eń úzdik tehnıkalyq jabdyqtar, eń zamanaýı telestýdııalar bolady. Basqa sózben aıtqanda, sapaly telearna qurýǵa qajettiniń bári bolady. Onyń ishinde zamanaýı beınemuraǵat ta», - dedi A.Jumaǵalıev óz sózinde.
Sóz sońynda mınıstr, qazir mınıstrliktiń qazaqstandyq buqaralyq aqparat quraldarynyń básekege qabilettiligine jaǵdaı jasaý jolynda jumys istep jatqanyn atap kórsetti. «Bul bir kúnniń isi emes, kóptegen stereotıpterdi buzýǵa týra keledi», deıdi mınıstr A.Jumaǵalıev.
