Astanada jańa saıabaǵy men demalys aımaǵy bar qoǵamdyq keńistik salynyp jatyr
ASTANA. KAZINFORM — «Damý» parki sportty, mádenıetti jáne tabıǵatty biriktirgen biregeı keńistik bolmaq, dep habarlaıdy elorda ákimdiginiń resmı saıty.
Astanada qoǵamdyq keńistikter belsendi túrde damyp, qala turǵyndary úshin taza aýada demalýdy qoljetimdi ári jaıly bolyp keledi. Qaladaǵy alty aýdannyń bárinde jumys júrgizilip jatyr. Sonyń ishinde Esil aýdanynda taǵy bir demalys ornynyń qurylysy bastaldy.
— Park ortasynda jasandy toǵan paıda bolady. Búkil aýmaq sheńber túrinde jobalanyp, tabıǵat, sáýlet pen adamnyń úılesimin aıqyndaıdy. Park belsendi demalysqa arnalǵan ártúrli aımaqtardy qamtıdy. Jastar men sport súıer qaýym úshin skeıt-park, velotrek, rollerdrom, muz aıdyny, syrǵanaqtar, basketbol alańy jáne vorkaýt-aımaq qarastyrylǵan. Otbasylyq demalys úshin zamanaýı oıyn alańdary salynady, al mádenı sharalarǵa arnalyp amfıteatr men DJ-stantsııa ornatylady. Qonaqtardyń qolaılylyǵy úshin kofehanalar men shaǵyn saýda pavılondary ornatylady, — delingen habarlamada.
Al jaıaý demalysty unatatyndar úshin serýendeý alleıalary, jasyl aralshyqtar jáne kitap oqýǵa ne kezdesýge yńǵaıly ári jaıly oryndar qarastyrylǵan. Toǵannyń aınalasyna jaıaý júrginshiler men velosıped joldary salynyp, kelýshilerge ásem ortada serýendeýge jáne velosıped tebýge múmkindik beredi. Park janynan fıtnes-ortalyq salý da josparlanyp otyr. Ol sporttyq ınfraqurylymdy tolyqtyryp, biryńǵaı klasterdiń bir bóligine aınalmaq.
«Damý» parki sportty, mádenıetti jáne tabıǵatty biriktirgen biregeı keńistik bolmaq. Sý men sheńber — kontseptsııanyń basty elementteri ómir men úılesimdi beıneleıdi. Osylaısha park astanalyqtar men qala qonaqtary úshin jańa tartymdy orynǵa aınalady.
Eske sala ketsek, bıyl elordada shamamen 170 aýla men qoǵamdyq keńistikti (saıabaqtar, gúlzarlar, jelekjoldar) abattandyrý jumysy júrgizilýde. Bul jumys qalanyń barlyq aýdanyn, onyń ishinde turǵyn alaptardy da qamtıdy. Qazirgi ýaqytta onyń basym bóligi aıaqtaldy.
Buǵan deıin Astanada Konstıtýtsııa kúni qarsańynda jańa saıabaq ashylǵanyn jazǵanbyz.