Astanada jańa Prezıdenttik kitaphana mańynda kólik tonneli salynyp jatyr
ASTANA. KAZINFORM – Elordadaǵy Almaty kóshesinde jańa Prezıdenttik kitaphanaǵa aparatyn kólik tonneli salynyp jatyr. Joba qalanyń osy bóligindegi kólik qozǵalysyn ońtaılandyrýǵa jáne keptelisti azaıtýǵa baǵyttalǵan.
Aıta keteıik, aýmaǵy 108 myń sharshy metr bolatyn Prezıdenttik kitaphana Túrkistan, Kereı, Jánibek handar, Aqmeshit, Almaty kósheleriniń tórttiginde salynyp jatyr. Ǵımarat 2028 jyldyń maýsym aıynda paıdalanýǵa beriledi. Onyń qurylysyn shveıtsarııalyq «SPADEA SA» fılıaly júrgizip jatyr.
Tonneldiń jalpy uzyndyǵy 800 metrge, bıiktigi – 5,5 metrge jetedi. Onda ár baǵytta eki jolaqtan tórt jolaqty qozǵalys uıymdastyrylady. Nysan 2026-2027 jyldary qoldanysqa berilmek.
Jobany kólik júktemesin jeńildetip qana qoımaı, qalanyń zamanaýı sáýlet kelbetin de jaqsartady. Tonnel ústinde alleıa men jasyl jelekti qamtıtyn keshendi abattandyrý jumystary josparlanǵan.
Jobany «Astana Bas jospary» ǵylymı-zertteý jobalaý ınstıtýty ázirlegen, tehnıkalyq qadaǵalaýdy «Qazqurylysjúıesi» JShS júrgizip jatyr. Aýqymdy jobanyń bas merdigeri – «Integra Construction KZ» JShS, al qurylysyn avtojol jáne tonnel nysandaryn salýda mol tájirıbesi bar halyqaralyq qytaı kompanııasy China Road and Bridge Corporation (CRBC) júzege asyrady. Injenerlik jelilerdi kóshirý jáne qaıta qurý jumystaryn «AstanaVodServıs» JShS oryndaıdy.
– Avtokólik júrgizýshilerine mańyzdy habarlama: Almaty kóshesinde tonnel qurylysyna baılanysty jol qozǵalysy kezeń-kezeńimen jabylyp keledi. Aqmeshit pen Túrkistan kósheleri aralyǵy 18 maýsymnan beri jabyq. Aqmeshit pen Saýran kósheleri aralyǵy 20 shildede jabylǵan. Al 15 tamyzdan bastap Almaty kóshesiniń Máńgilik El dańǵylynan Túrkistan kóshesine deıingi bóligi tolyǵymen jabylady. Bul shekteýlerdiń barlyǵy jyl sońyna deıin saqtalady. Sondyqtan júrgizýshilerden jol baǵytyn aldyn ala josparlaýdy suraımyz, – dep habarlady merdiger kompanııa.
Qurylys alańynda asfaltbeton jabyny, syrtqy jaryqtandyrý tirekteri, jarnama konstrýktsııalary, trotýar taqtaıshalary jáne qoldanystaǵy ınfraqurylymnyń basqa da elementteri alynyp tastaldy. Sonymen birge, ınjenerlik kommýnıkatsııalar kóshirilip, turmystyq kárizdi tóseý jalǵasyp jatyr.
– Tonnel paıdalanýǵa berilgen soń turǵyndar úshin kitaphanaǵa ońaı ári yńǵaıly jol ashylady. Kólik aǵyndary durys bólinip, Esil aýdanynyń jol-kólik jelisindegi júkteme edáýir jeńildeıdi, – deıdi Integra Construction KZ.
Buǵan deıin Astana-1 vokzalyn qaıta jańǵyrtý jumystary qalaı júrip jatqanyn habarlaǵan edik.
Sondaı-aq, Qosshy baǵytyna tartylyp jatqan Tarlan Astana jelisiniń qurylysynda alǵash ret DF30/245 arnaıy kópirqurastyrǵysh tehnıka paıdalanylyp, alǵashqy arqalyq ornatyldy.
