Astanada jańa polıtsııa bólimshesi ashylady
ASTANA. QazAqparat - 31 jeltoqsan kúni Jańa jyl qarsańynda Astana qalasynyń Almaty aýdandyq Іshki ister basqarmasynyń jańa polıtsııa bólimi ashylady. Jańa bólim Ońtústik-shyǵys turǵyn alaby Bórili kóshesi, 18 (Obaǵan kóshesiniń qıylysy) mekenjaıy boıynsha ornalasqan, dep habarlady astana.kz.
Taratylǵan habarlamaǵa sáıkes, aýdany 1200 sharshy metrden astam aýdanda 110 qyzmetker jumys isteıdi. Olar Ońtústik-Shyǵys (oń jáne sol jaǵy), Promyshlennyı, Jeleznodorojnyı, Internatsıonalnyı, Mıchýrıno jáne Kúıgenjar turǵyn alabtaryna qyzmet kórsetedi. Jańa polıtsııa bólimi barlyq standarttarǵa saı keledi jáne barlyq baılanys quraldarymen jabdyqtalǵan, sondaı-aq ishki ister organdarynyń barlyq bazalaryna qosylǵan.
