Astanada jańa oqý jylynda 9 jańa bilim berý nysany ashyldy
ASTANA. KAZINFORM — Elordada jańa 2026-2027 oqý jylynda oqýshylarǵa qolaıly jaǵdaı jasaý jumysy jalǵasyp jatyr. Bıyl №13, №41, №72, №73, №79, №82 jáne №86 mektepter janynan jeti qosymsha oqý ǵımaraty salynyp, paıdalanýǵa berildi, dep habarlaıdy elorda ákimdiginiń resmı saıty.
Sonymen qatar eki jańa mektep ashyldy. Jańa ǵımarattar zamanaýı talaptarǵa saı jabdyqtalǵan. Munda oqý kabınetteri, ashanalar, sport zaldary jáne balalarǵa arnalǵan kovorkıng aımaqtary qarastyrylǵan.
Ár ǵımarattyń syıymdylyǵyna qaraı eki aýysymda 1000-nan 1200-ge deıin bala bilim ala alady. Qosymsha oqý ǵımarattarynyń ashylýy negizgi mektep korpýstaryna túsetin júktemeni azaıtyp, oqýshy oryndarynyń tapshylyǵyn azaıtýǵa múmkindik beredi.
Jalpy jańa oqý jylynda Astanadaǵy 206 orta bilim berý uıymynda 337 myńnan astam oqýshy bilim alyp jatyr. Bıyl shamamen 33 myń bala alǵash ret mektep tabaldyryǵyn attady.
Mektep ınfraqurylymyn keńeıtý – elordadaǵy basym baǵyttardyń biri. Sońǵy jyldary qalada jalpy syıymdylyǵy 100 myńnan astam oqýshy orny bar 44 jańa mektep paıdalanýǵa berildi. Onyń 23-i «Keleshek mektepteri» jobasy aıasynda salynǵan.
Jańa nysandar salýmen qatar, oqý jylyna daıyndyq aıasynda 38 bilim berý uıymynda jóndeý júrgizildi. Barlyq bilim berý nysany aldaǵy jylytý maýsymyna daıyndyq jumysyn aıaqtap, daıyndyq pasporttaryn aldy.
Jańa oqý ǵımarattarynyń ashylýy bilim berý úderisin uıymdastyrýǵa qosymsha múmkindik berip, balalar úshin qolaıly, qaýipsiz ári zamanaýı oqý ortasyn qalyptastyrýǵa jaǵdaı jasaıdy.
Osydan buryn Atyraý oblysynda 12 myń oryndyq 7 jańa mektep paıdalanýǵa berilgenin jazǵanbyz.
