Astanada jańa medıtsınalyq mekemeler, jylyjaı men bazarlar salynady

NUR-SULTAN. QazAqparat - Elordada qurylys materıaldary men medıtsınalyq maskalar shyǵaratyn kásiporyndar, sondaı-aq jańa medıtsınalyq mekemeler, jylyjaılar, bazarlar salynady, dep habarlaıdy QazAqparat tilshisi.

«Qalada jylyjaılar men azyq-túlik bazarlarynyń sanyn arttyramyz. Búgin ótken ınvestıtsııalyq keńeste jylyjaı kesheni men eki bazardyń qurylysy qoldaý tapty. Atqarylyp jatqan bul jumystar azyq-túlik qaýipsizdigin qamtamasyz etip, áleýmettik mańyzy bar azyq-túlik baǵasyn ustap turýǵa múmkindik beredi», - dep jazdy Nur-Sultan qalasynyń ákimi Altaı Kólginov Instagram-paraqshasynda.

Elorda basshysy atap ótkendeı, sonymen qatar atalǵan keńeste temirbetondy buıymdar, gıperpresstelgen kirpish óndiretin zaýyt qurylysy, aralanǵan aǵash ónimderi men jaryqdıodty jaryqshamdar óndirisi qoldaý tapty.

«Bul materıaldardyń barlyǵy da qurylysta qoldanylady. Qurylys qarqynyn eskersek, otandyq óndiris materıaldary salynyp jatqan obektilerdiń ózindik qunyn tómendetýge septigin tıgizedi.

Sondaı-aq, birqatar medıtsına mekemeleriniń qurylysyna jáne medıtsınalyq maska shyǵaratyn óndiriske qoldaý bildirildi. Árbir jeke joba –bul ekonomıkaǵa jeke ınvestıtsııa tartý ǵana emes, oǵan qosa jańa jumys oryndaryn qurý. Memleket basshysynyń tapsyrmasymen ınvestorlardyń jumys isteýine jaıly jaǵdaı jasaımyz»,- dep jazdy Altaı Kólginov.