Astanada jańa kitaphana ashyldy

ASTANA. KAZINFORM – Konstıtýtsııanyń 30 jyldyǵyna oraı elordada jańa kitaphana ashyldy, dep habarlaıdy qala ákimdiginiń resmı saıty.

Zamanaýı úlgidegi jańa mádenıet oshaǵy E-117 kóshesinde ornalasqan «Baǵystan» turǵyn úı kesheninde ashyldy. Saltanatty sharaǵa QR Parlamenti Májilisiniń depýtaty, «AMANAT» partııasy fraktsııasynyń jetekshisi Elnur Beısenbaev, Májilis depýtattary, elorda máslıhatynyń depýtattary, partııa ókilderi men mádenıet qyzmetkerleri qatysty.

Qonaqtar kitaphana zaldaryn aralap, kitap qorymen tanysty, oqý zalynda boldy jáne alǵashqylardyń biri bolyp abonement rásimdep, kitaphanaǵa jazyldy. Іs-shara aıasynda Konstıtýtsııanyń 30 jyldyǵyna arnalǵan «Aıbary asqaq Ata Zań» atty kitap kórmesi uıymdastyryldy.

Astana qalasy ákimdiginiń «Ortalyqtandyrylǵan kitaphana júıesi» KMM dırektory Gúlbadan Mádibaeva jańa ortalyqtyń turǵyndar úshin mańyzy zor ekenin atap ótti.

«Qorda 3 myńnan astam kitap bar. Jyl saıyn 2-3 myń oqyrman qabyldaýdy josparlap otyrmyz. Barlyq qyzmet tegin: oqyrmandar kitaptardy ornynda oqı alady nemese úıge alyp kete alady. Kompıýterlermen jabdyqtalǵan mýltımedııalyq zal jumys isteıdi, ınternet pen Wi-Fi da tegin. Bul – jastar men qala turǵyndary úshin úlken múmkindik», – dedi ol.

Kitaphananyń aýmaǵy shamamen 150 sharshy metrdi quraıdy. Munda tórt qyzmetker jumys isteıdi. Ǵımarat «abonement», mýltımedııalyq jáne oqý zaldaryna bólingen. Kitaphana janynan poezııa klýby, qolóner úıirmesi, tarıhty zertteý sektsııasy men balalarǵa arnalǵan ádebı-tanymdyq úıirme ashylady.

Astana qalasy Mádenıet basqarmasynyń basshysy Janabaı Meıirmanqulov elordadaǵy bul jańa nysannyń 23-shi kitaphana ekenin jetkizdi.

«Bıyl taǵy eki kitaphana ashýdy josparlap otyrmyz. Tórtinshi toqsanda qaladaǵy kitaphanalar sany 25-ke jetedi. Olardyń barlyǵy jańa aýdandarda memlekettik qarajat esebinen ashylyp jatyr», – dep atap ótti ol.

Aıta keteıik, jańa tehnologııa men jasandy ıntellekt kitaphanalardyń jumysyn ózgertip jatyr.