Astanada «jańa qazaq» stılinde erekshe meshit ashyldy
«Bul meshittiń formasy Qazaqstandaǵy birde-bir meshitke uqsamaıdy. Іshi de ózgeshe. Mıxraby qabyrǵadan beri qaraı ornalasqan. Al energııa tutyný jaǵynan álem boıynsha biregeı nysan bolyp sanalady. Sebebi energııany tolyǵymen kúnnen alady. Artyq energııany da óndirýge múmkindik bar. Ony qalaǵa satyp, jylyna 4 mln teńge paıda kórýge bolady. Bunyń barlyǵy - Astanadaǵy EKSPO kórmesiniń nátıjesi», - deıdi S.Janbolatov.
Onyń aıtýynsha, jańa meshitke 750 adam sııady. Degenmen, namaz kezinde qatarǵa turǵanda, oǵan bir myńnan astam adam kire alady.
«Meshit jyly. Edendi arnaıy jylytý júıesi tartylǵan. Іshki sáýleti de aıryqsha, avangard úlgisinde jasalyp otyr. Biz ony «jańa qazaq» stıli dep ataımyz», - dep atap kórsetti S.Janbolatov.
Aıta keteıik, búgin Astanada jańa úlgidegi meshit ashyldy. Nysannyń ashylý rásimine QR Prezıdenti Ákimshiligi, Úkimet pen Parlament músheleri qatysty. Meshitke Yryskeldi qajynyń aty berilip otyr.
QazAqparat tilshisine suxbat bergen meshittiń bas ımamy Jaqııa qajy Ismaılov ıntererde oıý-órnek pen jazýlardyń azdyǵyn túsindirdi.
«Meshittiń syrtqy sáýleti erekshe bolyp shyqty. Munaranyń ústinen qaraǵanda meshit gúlge uqsaıdy. Búginde ony halyq arasynda «Allanyń gúli» dep atap ketti. Meshittiń taǵy bir ereksheligi - ishi qarapaıym. Qabyrǵalary appaq, kóp jazýlar joq. Kúmbezdiń aınalasynda ǵana Alla taǵalanyń toqsan toǵyz aty jazylǵan. Basqa jerinde adamnyń oıyn alyp ketetin eshqandaı áshekeı de, oıý-órnek te joq. Ol da - jańa meshittiń ereksheligi. Meshittiń mıxraby da ózgeshe salyndy. Olaı istegen sharıǵatqa qaıshy emes. Sosyn jańa nysan tolyǵymen otandyq materıaldardan salynyp otyr», - deıdi Jaqııa qajy.
