Astanada jańa kameralar 20 myńnan astam beldik taqpaǵan júrgizýshini anyqtady
ASTANA. KAZINFORM – Astanada bıyl naýryz aıynan bastap iske qosylǵan jańa ıntellektýaldy beınebaqylaý júıesi 20 myńnan astam júrgizýshiniń qaýipsizdik beldigin taqpaı kólik basqarǵanyn tirkedi.
Bul týraly Óńirlik kommýnıkatsııalar qyzmetinde ótken brıfıngte Astana qalasy Polıtsııa departamenti Ákimshilik polıtsııa basqarmasynyń bastyǵy, polıtsııa polkovnıgi Nurlan Ývaev aıtty.
Onyń sózinshe, elordada «Sergek» júıesimen qatar «Presight AL LTD» kompanııasynyń ıntellektýaldy keshenderi de qoldanyla bastady. Olar jol qozǵalysy erejesin buzýdyń 15 túrin avtomatty túrde anyqtaı alady.
– Jańa keshenderdi kezeń-kezeńimen engizý barysynda qaýipsizdik beldigin taqpaı kólik basqarýdyń 20 myńnan astam deregi, kólik júrgizý kezinde uıaly telefon paıdalanýdyń shamamen 2,5 myń jaǵdaıy jáne júrgizýshilerdiń jaıaý júrginshilerge jol bermegen 127 deregi anyqtaldy, – dedi Nurlan Ývaev.
Onyń aıtýynsha, qazir júıeni keńeıtýge arnalǵan montajdaý jáne tehnıkalyq jumystar jalǵasyp jatyr.
Sonymen qatar jańa kameralar jańa quqyq buzýshylyq túrlerin engizbeıdi. Olar tek zańnamada jaýapkershilik kózdelgen qoldanystaǵy quqyq buzýshylyqtardy avtomatty túrde tirkeıdi.
Aıta keteıik, Astanada jol erejesin buzǵan 19 myńnan astam jaıaý júrginshi jaýapqa tartyldy.
