Astanada jańa ınsýlt ortalyǵy ashyldy
ASTANA. QazAqparat - Elordada Aqmola oblystyq №2 oblystyq aýrýhananyń bazasynda jańa ınsýlt ortalyǵy ashyldy, dep habarlaıdy «QazAqparat» HAA tilshisi.
Vedomstvodan túsindirgendeı, ınsýlt ortalyǵyn ashýdyń negizgi maqsaty mıdyń qan aınalymynda aqaýy bar naýqastarǵa joǵary mamandandyrylǵan medıtsınalyq kómek kórsetý bolyp tabylady. Bul ortalyq 7 aýdannyń, atap aıtqanda Tselınograd, Astrahan, Arshaly, Ereımentaý, Egindikól, Qorǵaljyń jáne Shortandy óńirlerindegi osyndaı patologııasy bar adamdardyń ólim jáne múgedektik jaǵdaıyn azaıtady.
Insýlt ortalyǵyn jaraqtandyrý úshin oblystyq bıýdjetten qarajat bólingen.
Mı qan aınalymyndaǵy aqaýdy der kezinde anyqtaý úshin Revolution EVO GE - 64 kompıýterlik tomografy satylyp alynǵan. Ortalyq 15 adamǵa arnalyp otyr. Sonymen birge, bólimshede terapııa men jansaqtaý bólimine arnalǵan taǵy 3 oryn bar.
Aıta ketsek, bıylǵy jyldyń sońyna deıin oblystyq densaýlyq saqtaý basqarmasy Atbasar kópqyzmetti aýdanaralyq aýrýhananyń bazasynda taǵy bir ınsýlt ortalyǵyn ashýdy kózdep otyr.
