Astanada jańa emhanalar men aýrýhanalar ashylady
ASTANA. QazAqparat - Astana qalalyq densaýlyq saqtaý basqarmasynyń basshysy Kamaljan Nadyrov elordadaǵy medıtsınalyq uıymdar júıesiniń 2025 jylǵa deıingi damý jospary týraly baıandady, dep habarlaıdy QazAqparat tilshisi.
«Jańa densaýlyq saqtaý nysandary turǵyzylatyn aýdandar men jer ýchaskeleri anyqtaldy. Aldaǵy jyldary úsh emhana, ońaltý ortalyǵy, hospıs, 500 oryndyq kópbeıindi aýrýhanalar, №1 qalalyq aýrýhana janynan 250 oryndyq perınataldy ortalyq salynady», - dedi ol Astana qalalyq densaýlyq saqtaý basqarmasynyń keńeıtilgen alqa otyrysynda.
K. Nadyrov qazirgi ýaqytta qala emhanalarynyń 1,5 ese artyq júktememen jumys istep jatqandaryn atap ótti. Bul medıtsınalyq kómektiń qoljetimdiligine de áser etedi. Jyl saıyn qala halqy sanynyń qarqyndy ósýinen osyndaı másele týyndap otyr.
«Jańa nysandar qurylysy kóp shyǵyndy talap etkendikten, bos turǵan, suranysy joq mekemelerdi satyp alý nusqasy qarastyrylǵan», - dep óz sózin tolyqtyrdy basqarma basshysy.
Onyń baıandamasyna qala ákimi Áset Isekeshev óz pikirin bildirdi.
«Rasymen de, turǵyndarǵa jaqyn bolýy úshin jańa medıtsınalyq mekemelerdi turǵyzý josparymyzda bar. Jaǵalaý men ózge aýdandarda emhanalar qurý jobalaryn júzege asyrýymyz kerek. Eń aldymen, memlekettik-jekeshelik áriptestik tetigi boıynsha jumys isteımiz. Qyzyǵýshylyq joq bolǵan jaǵdaıda, bıýdjet esebinen qurylysty bastaımyz», - dedi ákim.
Aıta keteıik, búginde qalada 200-ge jýyq medıtsınalyq uıym jumys isteıdi.
