Astanada jańa emhanalar ashylyp, medıtsınalyq qyzmet tsıfrlandyryldy
ASTANA. KAZINFORM — Elordada 2025 jyly densaýlyq saqtaý salasynda birqatar júıeli jumys atqarylyp, medıtsınalyq qyzmettiń sapasy men qoljetimdiligin arttyrýǵa baǵyttalǵan mańyzdy jobalar júzege asyryldy.
Astananyń turǵyndary jyl saıyn shamamen 100 myń adamǵa artyp keledi. Osyǵan baılanysty medıtsınalyq ınfraqurylymdy damytýǵa erekshe kóńil bólinip otyr. Atap aıtqanda, medıtsınalyq uıymdar tapshylyǵyn azaıtý maqsatynda tórt jańa emhana iske qosylyp, «Nurly jol» vokzaly aýdanynda jeke medıtsınalyq ortalyq ashyldy.
Sonymen qatar eki aýrýhanada aýqymdy jóndeý júrgizildi. Olardyń biri — kóp jyldan beri qala turǵyndaryna qyzmet kórsetip kele jatqan № 3 qalalyq kópbeıindi aýrýhananyń eski ǵımaraty.
— Ǵımaratty jańǵyrtý barysynda ınjenerlik jeliler, palatalar, operatsııalyq bloktar men dıagnostıkalyq kabınetter tolyq jańartylyp, zamanaýı medıtsınalyq jabdyqtarmen qamtyldy. Bul patsıentter men medıtsına qyzmetkerleri úshin qolaıly jaǵdaı jasaýǵa baǵyttalǵan, — deıdi basqarma.
Qazirgi ýaqytta aýrýhananyń terapevtik bólimi, as blogy, ákimshilik ǵımaraty jáne ózge de bólimshelerinde jóndeý jumystary jalǵasyp jatyr. Atalǵan jumystardy 2026 jyly aıaqtaý josparlanǵan.
Sondaı-aq № 2 qalalyq kópbeıindi aýrýhana janynan qabyldaý-dıagnostıkalyq keshen men perınataldyq ortalyqtyń qurylysy bastaldy. Budan bólek, medıtsına qyzmetkerlerine arnalǵan 300 oryndyq jataqhana salynýda. Aldaǵy jyly jańa kópbeıindi aýrýhana, Esil jáne Nura aýdandarynda eki emhana, sondaı-aq Esil aýdanynda balalarǵa arnalǵan travmatologııalyq korpýs paıdalanýǵa berilmek.
Medıtsınalyq mekemelerdi zamanaýı qural-jabdyqtarmen qamtamasyz etýge de basymdyq berilgen. 2025 jyly 276 medıtsınalyq jabdyq satyp alynǵan. Jedel járdem qyzmetiniń jumysyn jedeldetý maqsatynda avtokólikter alynyp, avtopark 100 paıyz jańartyldy.
— Kadr máselesin sheshý baǵytynda da naqty sharalar qabyldandy. 2024-2028 jyldarǵa arnalǵan jergilikti bıýdjet esebinen rezıdentýraǵa 72 grant bólinip, 45 dáriger jumysqa ornalastyryldy. Sonymen qatar sheteldik mamandardy tartý arqyly tájirıbe almasýǵa 64 medıtsına qyzmetkeri qatysty, — delingen habarlamada.
«Jumysshy mamandyqtar jyly» jáne «Medıtsına qyzmetkerleriniń biliktiligin arttyrý jyly» aıasynda shamamen 3 800 medıtsına qyzmetkeri oqytylyp, olardyń 59-y shetelde sırek mamandyqtar boıynsha biliktiligin arttyrdy.
— Balalar densaýlyǵyn nyǵaıtý maqsatynda bes memlekettik mektepte stomatologııalyq kabınetter ashylyp, № 1 qalalyq kópbeıindi aýrýhana bazasynda balalar stomatologııasy jumysyn bastady. Sondaı-aq aýtızmi bar balalarǵa arnalǵan kúndizgi statsıonar iske qosyldy, — dep habarlady ákimdikten.
Akýsherlik-gınekologııalyq kómektiń qoljetimdiligin arttyrý úshin Sıtýatsııalyq ortalyq qurylyp, qala deńgeıinde uryqty qorǵaý ortalyǵy jumys istep tur. Júkti áıelderge joǵary mamandandyrylǵan medıtsınalyq kómek kórsetilip, týa bitken jáne tuqym qýalaıtyn aýrýlardyń aldyn alý maqsatynda eksperttik deńgeıdegi prenataldyq dıagnostıka júrgiziledi.
Elordada jasandy ıntellekt tehnologııalary da medıtsına salasyna engizilýde. Qazirgi tańda onkologııalyq aýrýlardy erte anyqtaýǵa múmkindik beretin jasandy ıntellektke negizdelgen PACS júıesi iske qosylyp, dıagnoz qoıý merzimi 30 kúnnen 3 kúnge deıin qysqardy. Ortalyq serverde 126 myńnan astam rentgenologııalyq zertteý jınaqtalyp, olardyń 9 myńnan astamy óńdelgen.
Sonymen qatar ınsýltti 10 mınýt ishinde anyqtaýǵa múmkindik beretin Cerebra júıesi engizildi. Jasandy ıntellektini qoldaný dıagnostıka jyldamdyǵy men dáldigin arttyryp, medıtsınalyq kómektiń sapasyn jańa deńgeıge kóterip otyr.
Aıta keteıik, Ardagerlerge arnalǵan medıtsınalyq kómekti jetildirý joldary qaraldy.
Endi medıtsına qyzmetkerlerine kúsh qoldanǵandar 12 jylǵa deıin sottalady.