Astanada jańa bastapqy medıtsınalyq-sanıtarlyq kómek kórsetý ortalyǵy ashyldy

Ortalyq zamanaýı medıtsınalyq jabdyqtarmen jabdyqtalyp, bir aýysymda 150 adamdy qabylda alady, dep habarlaıdy elorda ákimdiginiń baspasóz qyzmetinen. Sondaı-aq ortalyq bazasynda halyqqa shuǵyl medıtsınalyq járdem kórsetetin 3 brıgadalyq jedel medıtsınalyq járdemniń qosymsha stansasy jumys isteı bastady. Jańa ortalyqtyń ashylýy №7 qalalyq emhana júktemesin azaıtyp, shoıyn quıý zaýyty aýdany men óndiris turǵyn alabynyń shet aýmaqtarynyń halqyn qoljetimdi medıtsınalyq járdemmen qamtamasyz etedi. Ortalyqta flıýorografııalyq qurylǵy, naýqastardy ýltradybystyq tekserýge arnalǵan statsıonarlyq apparat, zerthanalyq jáne fızıoterapııalyq apparattar ornatylǵan. «Bul jerde jalpy praktıkalyq dárigerlerdiń qabyldaýlary uıymdastyrylǵan. Túrli zerthanalyq zertteýler júrgizilip, protsedýralyq jáne ekpe jasaý kabınetteri, kúndizgi statsıonar, ıaǵnı, halyqaralyq tájirıbege saı BMSK ortalyǵyndaǵy barlyq qajetti em sharalary júrgiziledi», - dedi elordalyq densaýlyq saqtaý basqarmasynyń basshysy Aıgúl Segizbaeva. Ortalyqtyń ashylýy qazirgi tańda medıtsınalyq mekemeden tarshylyq kórip otyrǵan «Óndiris» turǵyn alaby turǵyndaryna kórsetiletin medıtsınalyq kómektiń kólemin keńeıtip, qoljetimdiligin arttyra túsedi. «Dostyq» BMSK ortalyǵy J.Dosmuhameduly kóshesi, 24 úı mekenjaıy boıynsha ornalasqan.