Astanada jańa balalar aýrýhanasy salynady: Qurylys merzimi men maqsaty
ASTANA. KAZINFORM – Aýqymdy qurylystyń alǵashqy kezeńinde elimiz boıynsha 8 zamanaýı perınataldy ortalyq, 7 kópbeıindi balalar aýrýhanasyn salý josparlanyp otyr. Astanada balalarǵa arnalǵan 200 oryndyq aýrýhananyń qurylysy 2027 jylǵy qańtarda bastalmaq. Ol qashan ashylady, qandaı bólimsheler jumys isteıdi jáne jylyna qansha bala em qabyldaı alady? Ulttyq shuǵyl medıtsınany úılestirý ortalyǵynyń basqarma tóraǵasy Erjan Ádilbekovpen suhbattastyq.
– Erjan Serikqalıuly, Prezıdent keshegi Joldaýynda balalar densaýlyǵyna erekshe toqtalyp, jańa aýrýhanalar salýdy tapsyrdy. Onyń biri Ulttyq shuǵyl medıtsınany úılestirý ortalyǵynyń aýmaǵynda boı kótermek...
– Iá, Memleket basshysynyń tapsyrmasy aıasynda Astanada balalarǵa arnalǵan zamanaýı shuǵyl medıtsınalyq kómek ortalyǵyn salý josparlanyp otyr. Nysan elordanyń Nura aýdanynda, Turan dańǵylynyń boıynda ornalasady.
Jobanyń negizgi maqsaty – balalarǵa shuǵyl ári joǵary mamandandyrylǵan medıtsınalyq kómektiń qoljetimdiligin arttyrý. Ortalyq 200 statsıonarlyq tósek-orynǵa eseptelgen jáne eń ozyq qural-jabdyqtarmen jasaqtalady.
– Qurylys qashan bastalady jáne nysan qashan paıdalanýǵa berilmek?
– Jobalyq qujattama osy jyldyń 14 tamyzynda memlekettik saraptamanyń oń qorytyndysyn alyp úlgerdi. Qurylys jumystaryn 2027 jylǵy qańtarda bastaýdy josparlap otyrmyz. Jobany eki jyl ishinde júzege asyryp, qurylysty 2028 jylǵy jeltoqsanda tolyq aıaqtaý kózdelgen.
– Jańa aýrýhananyń qurylymy qandaı bolady? Balalarǵa naqty qandaı baǵyttar boıynsha kómek kórsetiledi?
– Biz balalarǵa shuǵyl kómek kórsetetin hırýrgııalyq jáne pedıatrııalyq bólimshelerdi tolyq qamtımyz. Hırýrgııa salasynda: balalar hırýrgııasy, irińdi hırýrgııa, neırohırýrgııa, jaq-bet hırýrgııasy, travmatologııa jáne ortopedııa, oftalmologııa, LOR jáne ýrologııa-gınekologııa baǵyttary jumys isteıdi.
Al terapııa jáne pedıatrııa baǵytynda: allergologııa, toksıkologııa, nevrologııa, endokrınologııa, gastroenterologııa, kardıologııa, nefrologııa jáne pýlmonologııa boıynsha mamandandyrylǵan kómek kórsetiledi.
– Jańa týǵan náresteler men shala týǵan sábılerdi kútip-baptaý máselesi eskerilgen be?
– Álbette, nárestelerge medıtsınalyq kómek kórsetý – eń basty baǵyttarymyzdyń biri. Ortalyqta jańa týǵan sábılerge kúrdeli hırýrgııalyq em júrgizý, shala týǵan nárestelerdi zamanaýı apparattarmen kútip-baptaý jáne nárestelik kezeńdegi túrli patologııany emdeý múmkindikteri tolyq qarastyrylǵan.
– Aldyn ala esepteýler boıynsha, aýrýhana jylyna qansha balany qabyldaı alady?
– Boljam boıynsha, munda jylyna shamamen 8 900 bala em qabyldaı alady. Bul kórsetkish tósek-oryndardyń 85 paıyz qýattylyqta jumys isteýi jáne ár naýqastyń aýrýhanada orta eseppen 7 kún jatý uzaqtyǵy negizinde eseptelgen. Árıne, naqty san naýqastardyń dıagnozy men emdeý kúrdeliligine qaraı ózgerip otyrady.
– Bul ortalyq tek Astana balalaryna arnalǵan ba, álde óńirlerden de naýqastar qabyldana ma? Shalǵaı aýyldardaǵy balalardyń jaǵdaıy qalaı bolady?
– Joq, bul tek elordalyqtarǵa ǵana emes, respýblıkalyq deńgeıdegi ortalyq bolady. Ásirese shalǵaı jáne qatynaýy qıyn eldi mekenderde turatyn, joǵary tehnologııalyq emge muqtaj balalar úshin qyzmet etedi. Naýqastardy jerústi kóligimen de, qajet bolǵan jaǵdaıda medıtsınalyq avıatsııa arqyly da shuǵyl túrde jetkizý júıesi jolǵa qoıylady.
– Jańa aýrýhananyń dál osy Ulttyq shuǵyl medıtsınany úılestirý ortalyǵynyń aýmaǵynda ornalasýynyń qandaı logıstıkalyq nemese medıtsınalyq artyqshylyǵy bar?
– Bul – óte tıimdi sheshim. Ortalyqtyń daıyn ınfraqurylymy jedel járdem qyzmetimen sekýndtar ishinde úılesimdi jumys isteýge múmkindik beredi. Bir keshende zamanaýı zerthanalar, dıagnostıkalyq jabdyqtar men túrli salanyń úzdik dárigerleri shoǵyrlanady. Sonyń arqasynda balanyń ómiri qyl ústinde turǵan sátte jan-jaqty konsılıým jasap, jedel sheshim qabyldaýǵa zor múmkindik týady.
– Suhbatyńyzǵa raqmet.
