Astanada jańa balabaqsha ashylady

ASTANA. QazAqparat - Mektepke deıingi mekemelerde kezekti azaıtý maqsatynda QR Bas prokýratýrasy elordada 48 oryndyq jańa balabaqshany paıdalanýǵa bermek. Atalmysh nysan Hýseın ben Talal men № 36 kósheleri qıylysyndaǵy kóppáterli turǵyn keshenniń birinshi qabatynda ornalasqan.

Bul týraly Astana qalasy ákiminiń resmı portaly habarlady.

Búgin elorda ákimdiginde Bas prokýrordyń birinshi orynbasary Iogan Merkel men Astana qalasy ákiminiń orynbasary Ermek Amanshaev mektepke deıingi uıymdy tapsyrý boıynsha memorandýmǵa qol qoıdy.

2016 jyldyń 1 qańtarynda balabaqsha memlekettik qabyldaý komıssııanyń aktisi boıynsha Astana qalasynyń kommýnaldyq menshigine beriledi. Atalmysh nysan № 54 «Nuraı» balabaqshasyna qarasty bolady dep josparlanǵan.

Elmıra Sýhanberdıeva, Astana qalasy Bilim basqarmasynyń basshysy:

"Bas prokýratýra búgin 48 oryndy balabaqshany jabdyqtady. Biz ózara yntymaqtastyq týraly memorandýmǵa qol qoıdyq. Qujat aıasynda 24 qyzmetkerdiń balalary men kezekte turǵan 24 bala atalmysh mektepke deıingi mekemede tárbıelenedi. Astana qalasynyń ákimdigi jańa 3 balabaqshany tapsyratyndyqtan, 1 qańtardan bastap balalardy jospardan tys toptaý júrgiziledi. Bul balabaqshada balalar úshin barlyq jaǵdaı qarastyrylǵan", - dedi Astana qalasy bilim basqarmasynyń basshysy Elmıra Sýhanberdıeva.

Jańa ǵımaratta jatyn oryn men kıim iletin bólmeden bólek, mýzyka, oıyn zaly, medıtsınalyq kabınet jáne tamaqtaný oryndary sońǵy úlgidegi qondyrǵylarmen jabdyqtalǵan, sondaı-aq, ádistemelik bólme de bar. Budan bólek, balabaqsha aýlasynda túrli-tústi syrǵanaq, átkenshek jáne ózge de sporttyq alańdar ornatylǵan.